حفصہ بنت عمر حفصہ بنت عمر رَضِیَ اللہُ تعالیٰ عنہا حضرت محمد صلی اللہ علیہ وآلہ سلم دے ذالیں وِچوں ہِک ہَن۔ آپ بعثتِ نبوی تُوں ٥ ورھیاں پہلاں ڄَمّے ہَن۔[١]

اُم المومنین حضرت حفصہ بنت عمر دے ناں دی خطاطی

ناں تے نسبلکھو

حفصہ ناں، عمر فاروق دی دِھی ہَن، سلسلہ نسب اِیہ ہِے، حفصہ بنت عمر بن خطاب بن نفیل بن عبد العزی بن رباع بن عبداللہ بن قرط بن رزاح بن عدی بن لوی بن فہر بن مالک۔ اَمّاں دا ناں زینب بنت مضعون ہئی، جیڑھی مہان٘درے صحابی عثمان بن مظعون دی بھیݨ ہَن اَتے آپ وی صحابیہ ہَن، حفصہ اَتے عبد اللہ بن عمر حقیقی بھیݨ بِھرا ہَن۔ حفصہ بعثتِ نبوی صلی اللہ علیہ وآلہِ وسلم دے پنڄ ورھیاں پہلاں ڄَمّے ہَن، اُوں ویلے قریش خانہ کعبہ دی اُساری وِچ لڳّے ہوئے ہَن۔

نکاحلکھو

پہلا نکاح خنیس بن حذافہ نال تِھیا۔ جیڑھے بنو سہم دے ٹَٻَّر وِچُوں ہَن۔

اسلاملکھو

اَمّاں اَبّا اَتے پئے دے نال مسلمان تھئے ہَن۔

کوچ کرݨ اَتے ݙوجھا نکاحلکھو

پئے دے نال مدینہ کُوچ کِیتا۔ غزوۂ بدر وِچ خنیس نے ٹَک کھادے اَتے وَل آ تے اِنّھاں ٹَکّاں دی پارُوں شہادت پاتی، عدّت دے بعد عمر کُوں حفصہ دے نکاح دی چِنتا تھی ڳئی، اِیں زمانے وِچ رقیہ بنت محمد جھوک لݙا چُکّے ہَن، اِیں بِناء اُتّے عمر سبھ تُوں پہلاں عثمان غنی رضی اللہ عنہٗ نال مِلّے اَتے اُنّھاں نال حفصہ دے نکاح دی آس ظاہر کِیتی، اُنّھاں نے آکھیا جو مَیں اِین٘دے اُتّے وِچار کریساں، کُجھ ݙیہاڑیاں ے بعد ملاقات تھئی، تاں اُنّھاں نے چِٹّا انکار کر ݙِتّا، عمر نے مایوس تِھی تے ابو بکر صدیق نال ڳالھ کِیتی، اُنّھاں نے خَموشی اختیار کِیتی، عمر کُوں اُنّھاں دی بے التفاتی نال ݙُکھ تِھیا، اِین٘دے بعد آپ رسالت پناہ حضرت محمدِ مصطفیٰ صلی اللہ علیہ و آلہٖ و سلم نے حفصہ نال نکاح دی ٓس ظاہر کِیتی، نکاح تِھی ڳیا تاں ابو بکر، عمر نال مِلّے اَتے آکھیا جو جِہڑیلے تُساں میکُوں حفصہ دے نکاح دی آس ظاہر کِیتی اَتے مَیں چُپ رِیہا، تاں تُہاکُوں نا گوار گُزریا، ڄاں جو مَیں اِیں بِناء اُتّے کُجھ جواب ناں ݙِتّا ہئی جو حضرت محمدِ مصطفیٰ صلی اللہ علیہ و آلہٖ و سلم نے اِنّھاں دا ذِکر کِیتا ہئی اَتے مَیں اِنّھاں دا بھید ناں ݙسݨاں چاہن٘دا ہَم۔ ڄیکر حضرت محمدِ مصطفیٰ صلی اللہ علیہ و آلہٖ و سلم دا اِنّھاں نال نکاح دا اِرادہ ناں ہون٘دا تاں مَیں اِین٘دے کِیتے اَمادہ ہَم۔[٢][٣]

اولادلکھو

کوئی اولاد نئیں چھوڑی۔

فضل تے کماللکھو

معنوی یادگاراں ٻہوں سارے ہِن اَتے اُوہ ہِن عبد اللہ بن عمر، حمزہ (بن عبداللہ)، صفیہ بنت ابو عبید (زوجہ عبد اللہ)، حارثہ بن وہب، مطلب ابی وادعہ، ام مبشر انصاریہ، عبد اللہ بن صفوان بن اُمیہ، عبد الرحمٰن بن حارث بن ہشام، حضرت حفصہ تُوں سَٹھ حدیثاں نقل کِیتیاں ڳئیاں ہِن، جیڑھیاں اُنّھاں نے حضرت محمدِ مصطفیٰ صلی اللہ علیہ و آلہٖ و سلم اَتے حضرت عمر فاروق تُوں سُݨیاں ہَن۔[٤][٥]

اخلاقلکھو

  • "اُوہ (حفصہ) صائم النّہار اَتے قائم الیل ہَن۔[٦]
  • ݙوجھی روایت وِچ ہِے: "جھوک لَݙ ون٘ڄݨ دے ویلے تئیں صائم رِیہے ہَن"۔

وفاتلکھو

حفصہ شعبان سن ٤٥ ہجری وِچ مدینہ منورہ وِچ جھوک لݙ ڳئے ہَن، اِیہ مُعاویہ دی ملوکیت دا ویلا ہئی۔ مروان نے جیڑھا اُوں ویلے مدینہ دا گورنر ہئی، نمازِ جنازہ پڑھائی اَتے کُجھ پن٘دھ تئیں جنازے کُوں مون٘ڈھا ݙِتّا، اِین٘دے بعد ابو ہریرہ جنازے کُوں گور تئیں گِھن ڳئے، اِنّھاں دے بِھرا عبد اللہ بن عمر اَتے اُنّھاں دے چھوہَراں عاصم، سالم، عبد اللہ اَتے حمزہ نے گور وِچ لہایا۔[٧]

حوالہ جاتلکھو

  1. سیر الصحابہ، سعید انصاری، جلد 6، صفحہ 50، دارالاشاعت کراچی
  2. صحیح بخاری ج2 ص571
  3. اصابہ ج8 ص51
  4. مسند احمد بن حنبل ج6 ص285
  5. مسند ابن حنبل ج6 ص281
  6. اصابہ ج8 ص52
  7. زرقانی ج3 ص271