حال احوال

میڈے شھر تونسہ شریف ءچ امجد کھوسہ جڈاں پہلی دفعہ جیتا ھا اوں وقت اساں چھوٹے ہاسے، ساکوں صرف نعرے مارنڑ دا ڈا آندا ھا، ساڈے بزرگیں فیصلہ کیتا کہ سردار صاحب کوں اوندے گھر ونج کے مبارک باد ڈتی ونجے، ھک ٹرک کرائے تیں کر کے اوندے وچ وڈے چھوٹے بلہا کے بہادر گڑھ یعنی سردار صاحب دی جاہ دو روانہ تھی پئے، اساں نکڑے بال وی چوری پَُچوری ٹرک ءچ پیھ گئے، کجھ معزز لوک ٹرک دے ٹُول ءچ تیں کجھ فرنٹ سیٹ تیں تشریف رکھی پئے ہن، ٹُول آلے حضرات بھانویں جینجھا نعرہ مریندے ہن اساں ہیٹھو باکدے ھاسے زندہ باد زندہ باد، نہ ککھ دی سمجھ انھیں کوں لگدی پئ ھئ نہ ساکوں، او آپڑیں جاہ تیں گِلھنڑ سُجائ پئے ھن اساں آپڑیں جاہ تیں، میکوں چنگی طرح یاد ھے، جڈاں اساں سردار صاحب دی بارگاہ ءچ حاضر ونج تھئے.

ادھے بندیں دی صرف بوتھی ہلدی ھئ الاء ناہ نکلدا، ٹرک ءچ ڈو ترائے گھنٹے کھڑ کھڑ کے لتاں سُج پیاں، بُکھ کنیں وات پٹی ودے ھاسے، خیر چاہ پانڑی دا بندوبست ھا پیاء، ونجنڑ دی خوشی توں زیادہ واپسی دا غم وڈا ھا جو ابے سئیں جُتی لہا کے اُو خدمت کیتی ساری سیاست ھوا تھی کے نکھتی، بھلا تھیوے سیاسدانیں دا جنھیں دی خاطر نکے ویلھے کنیں جو زلیل تھیونڑ تیں کُٹیجنڑ لگے ھئیں اللہ دی کرم نوازی نال ھُنڑ تئیں دھپیندے جُلدے ھئیں اے تاں شُکر ھے ڈھیٹ مٹی دے بنڑیے ھویے ھاسے جو برداشت کیتی پئے ھیں، کھوسہ صاحب تیڈا وی آخری کیارے ءچ پانڑی لگا ودے عمر دے لحاظ نال تیں سیاست دے لحاظ نال وی،، ویندی واری تاں کوئ چنگی فصل رہا ونج، بیاء وی کجھ نہ تاں ضلع بنڑوا چاء، اگر تونسہ ضلع بنڑ گیا تیڈی تیں تیڈے بعد تیڈے وڈی قد آلے پُتر دی سیٹ لیکی لاتھی ھے، نتاں اساں بندے خاری ھئیں اساں ووٹ خواجیں کوں ڈے ڈیونڑے انھیں دے بعد ولا خواجیں کوں ڈے ڈیونڑے، جینجھے وی ہن آخر ساڈے شھر دے تاں ھن، باقی جیرھے لوک آھدن خواجگان کوئ کم نیں کرویندے وائے پاگل دے سِرو، بھلا پیر و مرشد تھی کے تھاڈیاں گلیاں نالیاں تیں روڈ بنڑواون تھاکوں شرم نیں آندا ایں، گال تیں، کتھاں مرشدیں دی اولاد کتھاں اینجھے گندے کم، کُجھ تاں عقل نال سوچا کرو.