جمشید ناشاد نال پہلی ملاقات
جمشید ناشاد نال میڈی پہلی ملاقات، اَٹھ سال پہلے انہاں دے علاقے وچ انہاں دے آپڑیں مشاعرے وچ تھئی جہڑا سال پسالی تھیندے تے اوندے روحِ رواں ناشاد آپ ہوندن. پہلی ملاقات وچ گُھل مل ونجنڑ آلا ناشاد جینویں تڈاں ہا اج وی اونویں ہے اوندی طبیعت تے میل ملاپ وچ رتی بھر وی فرق نئیں آیا.کہیں وی شخص دی سیاپ اوندے علاقے دی اوندے نال محبت یا نفرت توں کیتی ونج سکدی ہے کیوں جو "گھر دا تھاں ہلکا ہوندے" پر ناشاد دے علاقے دے لوکاں دی ناشاد نال محبت تے پیار ڈیکھ کے میں حیران تھی گیاں اوندی بنیادی وجہ اے ہے جو ناشاد کم کیتے آپڑاں وقت ضائع نئیں کیتا تے نہ کیندے نال بغض رکھیائے آپڑیں ہستی مطابق اوں نے نہ صرف آپڑیں علاقے بلکہ پوری سرائیکی بیلٹ دے شعراء تے ادیباں کوں مانڑ عطا کیتے تے انہاں کو ہک جا اکٹھا کر کے ادب دی حقیقی خدمت کیتی اے. ڈھیر سارے نوجواناں دی سرپرستی کر کے ادب دوستی دا ثبوت ڈتے کیوں جو اوندے اندر منافقت کئے نی ایں پاروں شاعر ادیب تے سامعین اوندا احترام کریندن کیوں جو ناشاد دوستاں کوں کٹھا کر جانڑدے.
پہلے وی میں ہک جا تے لکھ چُکاں جو "دوستی تے دشمنی وچ کھرے لوک ہمیشاں جذباتی ہوندن" ایں حوالے نال میں ڈٹھیائے جو ناشاد جذباتی ضرور ہے مگر دوستی وچ جتلے تئیں دشمنی دی گالھ ہے تاں ناشاد جئے فقیر آدمی کہیں نال یا کہیں اوندے نال کیا دشمنی رکھڑیں ہے؟ اوندا وصف عاجزی ہے تے لوک ایہو جئے آدمی نال ڈھیر محبت رکھدن ایہوگالھ اوندی شاعری وچ وی جا جا تے ڈٹھی ونج سکدی ہے ناشاد نے شاعری کیتی اے نہ کہ بئے کجھ سرائیکی شاعراں وانگوں خدا، غربت تے حکومت نال جھیڑا کیتے. پرلی کندھی، پرایا چندر تے پپلیں ہیٹھ جہان، ناشاد دے ترائے شعری مجموعے اوندے شعری قد کاٹھ دا ثبوت ہن. ناشاد آپڑیں شاعری وانگوں کتاباں دے ناں وی بہوں سوہنڑیں تے نویکلے رکھن یکے مجموعاں دے ناں "پ" توں شروع تھیندن ایندی وجہ میں ناں جانڑدا پچھنڑ توں بعد ای کجھ آکھ سکساں. بہرحال یکے مجموعے بہوں سوہنڑیں چھپن.
استاد لوک آدھن جو شاعری آپڑیں وقت اچ چھپ ونجیں تاں چنگا ہوندے کیوں جو وقت گزرنڑ دے نال نال معاشرے وچ تبدیلی آندی ویندی ہے تے لوکاں دیاں سوچاں تے مزاج وی تبدیل تھی ویندن ایں حوالے نال ناشاد خوش نصیب ہن جو اوندی دی شاعری ٹھیک وقت تے چھپ کے ادبی حلقاں وچوں مقبولیت دی سند حاصل کر چکی ہے. ناشاد فطرتی شاعر ہے اوندا بہونڑ، کھلوونڑ، الاونڑ ہک مکمل شاعر وانگوں ہے اوندے مضامین وسیع ہن او آفاقی گالھ کرڑاں جانڑدے اوندے کول لفظ وی ہن تے انہاں کوں ورتنڑ دا سلیقہ وی ہے لسانی حوالے نال ناشاد ہک مضبوط شاعر ہے اونکوں زبان کوں ورتنڑ دا ڈاہ آندے مصرعاں دی ونڑت ایں گالھ دی گواہ ہے.
ڈوہڑا، قطعہ، نظم تے غزل ناشاد دیاں پسندیدہ اصناف ہن تھیندا اینویں ہے جو زیادہ تر شعراء کہیں ہک یا ڈو صنفاں وچ کمال رکھدے ہوندن پر ناشاد انہاں چاریں صنفاں وچ مہارت رکھدے تے انہاں نال انصاف کرڑاں وی جانڑدے انہاں چاریں صنفاں وچوں جہڑی صنف وی پڑھو تاں لگدے جو ناشاد اسے صنف دا شاعر ہے... اے کمال نی تاں بیا کیا ہے؟ چندر پرایا کر کے، پرلی کندھی ڈیکھنڑ توں بعد، ناشاد اج پپلیں ہیٹھ جہان وسائی بیٹھے.
(محمدظہیراحمدمہاروی، ٥ اکتوبر ٢٠١٦ء)
چودھار میڈے، ظلم دی بھا ہے، بیا کیا ہے؟
ارمان دیں لاشیں دی سُوآ ہے، بیا کیا ہے؟
کیا ڈیکھدا ہیں کھول کے اسمان دی کھڑکی؟
مخلوق دے روونڑ دا الا ہے، بیا کیا ہے!
روح ویسی تاں ونج ڈیکھسی اسمان تے کیا ہے
اسمان تےخود آپ خدا ہے، بیا کیا ہے؟
لب سی کےتیڈے در تے بیٹھا نیر وہیندے
ہک اے وی تاں سائل دی ادا ہے، بیا کیا ہے؟
تئیں سمجھے ساڈے گھر کوئی تارا پیا لہندے؟
ہنجوں دے چراغیں دا اشا ہے، بیا کیا ہے؟
ڈر گئیں توں میڈی ہنج دے دبکار کوں سنڑ کے؟
سانونڑ جو ہے دریا کوں وی ڈھا ہے، بیا کیا ہے؟
اے مصرعہ میڈی قبر دے کتبے تے لکھاۓ
مرمر کے اے جیونڑ وی سزا ہے، بیا کیا ہے؟
لوظیں دے عمل نال میں پتھریں کوں روینداں
اے میکوں میڈے رب دی عطا ہے، بیا کیا ہے؟
میں حشر دے ڈینہہ عرش دے ساۓ تے کھڑوتاں
ناشاد میکوں ماء دی دعا ہے، بیا کیا ہے؟
(جمشیدناشاد)