جاویدآصف محبتاں دا شاعر

یوسف نون

وسیب دے مہاندرے تے سوہݨے  شاعرتے نثر نگار سئیں جاویدآصف دیاں محبتاں دا تھورائیت ہاں، جنہاں اپݨے ݙو شعری مجموعے دان کیتے. انہاں دی شاعری اپݨی بھوئیں وچوں پھپھڑدی تے نسردی ہے. اپݨے وسیب وسیبی تہذیب تے ثقافت نال انہاں دا تے انہاں دی  شاعری دا گوڑھا گانڈھاہے. وہ اصل وچ حسن محبت تے  زندگی دے سوہݨے جذبیں دے شاعرہن. انہاں دی شاعری حق سچ تے احساس دا ݙوجھاناں ہے.  او اپݨے سوہݨے تے سچے جذبیں کوں احساس دے  لفظیں دا چولا چواڄاݨدن. انہاں دا خالص سوہݨا تے سنگھراہویا شعری ڈکشن انہاں دی خاص پہچاݨ ہے.

؎ روندیں کھلدیں اپݨی رین گزاری رکھدے

ساہویں نال حیاتی دی جنگ جاری رکھدے

ہیݨے اپݨی کاوڑ کہیں تے مارݨی تاں ہے

ہیݨا اپݨے منہ تے چاٹاں ماری رکھدے

اولوکیں دا حق کھاندیں وی دیر نئیں لیندا

او رمضان دے روزے وی ہرواری رکھدے

پکھیں سانگ بندوق رکھیندے اپݨے مونڈھے

وݨیں سانگ ہمیشہ ہتھیں آری رکھدے

آصف ہے جو سچ آکھݨ توں باز نئیں امدا

ہروستی وچ ہک ادھ دشمن دھاری رکھدے

(مبصر: یوسف نون)