توقیر احمد توقی
توقیر احمد توقی سرائیکی زبان دا شاعر ہے۔
ڄم پل
لکھوتونسہ نال تعلق ہے۔
نمونہ کلام
لکھوسݨو ہک داستاں میݙی توجہ نال غربت ہے
کیویں ݙیویں میں حال آپݨاں میں ہاں بے حال غربت ہے
غریبی ایں ولھیٹا ہے بچے بس تن تے کپڑے ہن
ابا ساکوں توں شئے گھن ݙے روندے ہن بال غربت ہے
جیرھے تنگ بہوں کریندے ہن پچھیں رج کے کٹیندا ہاں
میں رو رو کے منیندا ہاں کرو چپ لال غربت ہے
جیرھے ویلھے میں گھر وینداں ہوندی پرشان ہے گھر والی
آہدی ہے بال بکھے ہن توں گھن ݙے دال غربت ہے
میݙے پلے نئیں کجھ ہوندا میں دڑکے ذال کوں ݙینداں
نہ کر خرچے مریں اتنے توں کر کجھ خیال غربت ہے
سودے گھنݨ میں جاں وینداں سݨیندے بہوں دکان آلا
پہلا قرضہ لہا مویا ݙیوی رب ڳال غربت ہے
کیویں ٹبر پلاواں میں کیویں قرضہ لہاواں میں
میں سوچیں وچ نمہی چھوڑا کوئی سر دا وال غربت ہے
جواں دھی وی کنواری ہے نکاح اوندا وی کرݨے میں
ہے کلھا دم کیویں کراں کئی اٹھدین خیال غربت ہے
ناں داݨے گھر دے وچ رہ ڳین ناں گھا پٹھا کتھائیں رہ ڳئے
کریہہ دا سخت موسم ہے پٹیندے مال غربت ہے
کیرھا ݙینہ ہے جو تک چاتے ہکے گھر کوں بیماری وی
میݙا اللہ مصیبت کوں توں ہݨ چا ٹال غربت ہے
میݙا رب آ غریبی کوں ہٹا ݙے ہݨ جو تھک پئے ہیں
وݙا عرصہ نبھائے سے صبر دے نال غربت ہے
وݙی مدت پئی تھیندی ہے ایں غربت کوں ساݙے گھر آئیں
کوئی ہک ݙو ݙینہ تاں نئیں توقی ہے ویہواں سال غربت ہے
(ناچیز توقیراحمدتوقی)
نظم
لکھوموسم سارے چنگے ہوندین
چیتر بہار دی آپنڑی چس اے
من وچ جیڑا وسدے ہر دم
اوں منٹھار دی آپنڑی چس اے
جھنگ دیاں ونگاں آپنڑی جاہ تے
کیچ دے ہار دی آپنڑی چس اے
منہ تاں ویسے مٹھا لگدے
کھل مسکار دی آپنڑی چس اے
مساگ دے رنگ دی بئی نئیں تھیندی
کجل دی دھار دی آپنڑی چس اے
صورت کوں کہیں گندا آکھا
ہار سنگھار دی آپنڑی چس اے
شہر تاں سارے شہر ہوندے ہن
یار دے شہر دی آپنڑی چس اے
ہووے دور جیڑا پر نال ڈسیجے
ایجھیں یار دی آپنڑی چس اے
نبھ تاں ویندی ہے پیار متوں وی
توقی پیار دی آپنڑی چس اے
(توقیراحمدتوقی)
او کیجھاں ہوسی
لکھوہیں وے
توں جو آہدیں
کیا ہے اوندے اچ?
جیکوں روز
سوچیندا ہاں میں
جیندے خیال اچ
ڳم تھی وینداں
ڳم تھی وینداں
صم تھی وینداں
جئیں تے شعر
لکھیندا ہاں میں
ول او شعر
چمیندا ہاں میں
اوندیاں اکھیں
کرمیں والیاں
موراں وانگوں
چال ہے اوندی
پتلیاں پتلیاں
زلفاں اوندیاں
میݙے دل کوں
ݙاڈھیاں بھاندین
نین نشیلے
ہونٹ گلابی
جیندا لہجہ
مٹھا ماکھی
ڳال کرے تاں
نندر آندی ہے.
کوئی وی اوکوں?
ݙیکھ گھنے تاں
او اوں جاہ تے
رک ویندا ہے
ساہ وی اوندا
سک ویندا ہا
کتنا سوہݨے?
کتنا سوہݨے?
چندر توں پچھ
او جتنا سوہݨے
باغ اچ جیویں
دھمی دھمی
رنگےپرنگے
پھلیں اتیں
قطرے ڈھاندین
شبنم دے.
جتنے سوہݨے
پھل لڳدے ہن
پھلیں کولوں
ڈھیر او سوہݨے
اوندے بارے
کیا میں ݙساں?
لفظ نئیں رہ ڳئے
میݙے کولوں
کیا ہے اوندے اچ
ول ناں پچھیں?
میں آہدا ہاں
کیا نئیں اوندے اچ?
جیندا حال
سݨائے می تیکوں
خود توں سوچ
او کیجھاں ہوسی?
( ناچیز توقیراحمدتوقی)