ترائن دیاں جنگاں

شہاب الدین غوری، زبردست جنگجو تے ہک ماہر سپہ سالار ہئی۔ اوہ اپݨی سلطنت کوں محمود غزنوی دی سلطنت توں وی وسیع کرݨا چاہندا ہئی۔ اوں نے 1175ء وچ ہندوستان تے پہلی وار حملہ کر کے خطہ ملتان، موجودہ سرائیکی وسیب یا سرائیکستان کوں فتح کر گھدا، ایں دے بعد اوہ اُچ پہنچا جیہڑا ہݨ سرائیکستان دے ضلع بہاولپور وچ ہے. ہندوستان تے قبضے کیتے تھیوݨ والی جنگ نہایت نزدیک ہئی. شہاب الدین دے کول اجمیر و دہلی دے راجہ تے زبردست لڑاکا پرتھوی راج نال مقابلے کیتے اچھی فوج موجود ہئی۔

پہلے معرکے وچ پرتھوی راج دا پلہ بھاری رہا تے شہاب الدین کوں پنجاب وچ تھانیسار دے نزدیک ترائین دے مقام تے شکست تھئی. شہاب الدین غوری شدید زخمی تھیا تے غوری افواج میدان چھوڑ کے بھڄ گئیاں. جس تے غوری کوں شدید شرمندگی تھئی تے اوں نے اپݨے انہاں تمام فوجیاں کوں سزا ݙتی جنہاں نے دشمن کوں کنڈ ݙکھائی ہئی۔ 1192ء وچ اوہ مکمل تیاری تے پہلے توں مضبوط فوج دے نال واپس آیا. پرتھوی راج وی اپݨے اتحادیاں دے ہمراہ اڳوں ودھا. ہندؤاں تے مسلماناں دے درمیان ہک ہولناک جنگ چھڑی مگر ایں وار شہاب الدین غوری فاتح رہا تے پرتھوی راج چوہان، دوران جنگ مارا گیا۔ قنوج دے راجہ جے چند نے کافی مزاحمت کیتی مگر شہاب الدین نے اینکوں وی شکست ݙتی تے راجہ میدان جنگ وچ مارا گیا۔ انہاں جنگاں کوں ہندوستان دی تاریخ وچ ترائن دے جنگاں آکھا ویندا اے.