تحریک انصاف نال چار سال دی رفاقت

معراج محمد خان تحریک انصاف اچ شامل تھئے تاں کئی سنڳیاں میݙے نال وی رابظہ کیتا ،اس زمانے اچ میں لاہور دےہک اردو روزنامے اچ بطور سٹاف رپورٹر کم کریندا ہم تے نالے "مورچہ "دے ناں توں کالم وی لکھیندا ہم۔معراڄ محمد خان تحریک انصاف اچ شامل تھیوݨ توں پہلے قومی محاز آزادی دے چیئرمین ہن کیوں ڄو او بھٹو صاحب نال اختلافات دی وجہ توں ٻہوں پہلے پیپلز پارٹی چھوڑ چکے ہن تے قومی محاز آزادی دے ناں توں سیاست کرنیدے ہن۔

انہاں عمران خان دی موجودگی اچ ہک پریس کانفرنس اچ قومی محاذ آزادی کوں تحریک انصاف اچ ضم کرݨ دا اعلان کر ݙتا۔ بعد اچ تحریک انصاف دا انہاں کوں جنرل سیکرٹری بݨا ݙتا ڳیا۔اے اوہ زمانہ ہا ڄݙاں تحریک انصاف قومی انتخابات بری طرح ہار ڳئی ہا تے سارے جماعتیئے اوں کوں چھوڑ کے مل ڳئے ہن ۔

لاہور اچ خواجہ محمدجمیل،ارشد بٹ،سلیم بٹ،امین زکی،طارق مرزا، تے ݙوجھے کئی سنگتی ایجھئے سیاسی کارکن ہن ڄہڑے معراج محمد خان دی سیاست،نظریات ،شخصیت تے انہاں دے کردار تے اصولاں توں متاثر ہن تے انہاں دی تحریک دا آخر تک حصہ رہے۔

معراڄ محمد خان دی تحریک انصاف اچ شمولیت توں بعد اے سارے سنگتی وی تحریک انصاف اچ شامل تھی ڳئے ۔انہاں سنگتیاں دے اصرار تے ،اوں زمانے دے سیاسی حالات تے ٻہوں ساریاں سیاسی وجوہات کیتے میں وی تحریک انصاف اچ شامل تھی ڳیا ،میکوں تحریک انصاف پنڄاب دا میڈیا ایڈوائزر بݨا ݙتا ڳیا تے بعد اچ ڈپٹی سیکرٹری اطلاعات پنجاب دی ذمہ داری وی ݙے ݙتی ڳئی ۔ایں دوراں روزی روٹی چلاوݨ کاݨ میں ساؤتھ ایشیا پاٹنر شپ پاکستان ڄائن کر گھدی ۔محمد تحسین صاحب نال ذاتی جاݨ سنڄاݨ تاں کونا ہا پر انہاں دے بھائی پروفیسرعزیزالدین احمد صاحب اساݙے سیاسی استاد تے مرشد ہن ۔ہک ڈیہںہ ملک لیاقت حسین بھݙوال ڄہڑے کے میݙے بھرا تے جگر دار فرخ عطا بھݙوال دے والد ہن تے نالے قومی انقلابی پارٹی اچ اساݙے رہنما ہن ، میکوں محمد تحسین صاحب کول سیپ پاکستان دے دفتر گھن ڳئے ،محمد تحسین میں اڄڑے پڄڑے کوں اپݨے سینے نال لا ڳدا ۔۔۔۔۔۔ میں نیواں میݙا مرشد اچ تے اساں اچیاں نال لائیاں صدقے تھیواں انہاں اچیاں توں جنہاں نیویاں نال نبھایاں سیپ پاکستان اچ میکوں کڄھ عرصے بعد میڈیا لائیزان آفیسر بݨا ݙتا ڳیا تے ولا ماہنامہ "چانن " ڄہڑا کہ بنیادی طور تے کساناں تے کھیت مزدوراں دی آواز تے سیپ پاکستان دا "ماؤتھ آرگن " ہا، اوں دا ایڈیٹر بݨا ݙتا ڳیا ،اگر اے آکھوں ڄو میں "چانن" دا بانی ایڈیٹر ہم تاں زیادہ مناسب ہوسی ۔بعد اچ سیپ پاکستان اچ ذمہ داریاں بدلدیاں رہیاں تے اج وی اپݨا حصہ پیندے ودے ہاں تے نالے سیپ پاکستان نال محبت دا اے سفرجاری ہے پیا۔

انہاں ݙینہاں اچ میں سارا ݙینہہ سیپ پاکستان اچ کم کرندا ہم تے پنج وجے توں بعد تحریک انصاف دے سیکرٹیریٹ اچ تحریک انصاف دا کم کریندا ہم جہڑا کہ رات باراں وڄے تک جاری رہندا ہائی ،بھلا وت وی انرجی لیول بحال رہندا ہائی تے تھکاوٹ دا شائبہ تک نائی تھیندا۔ایں زمانے اچ اساں عمران خان نوں اندرون لاہور دیاں تنگ تے تاریک ڳلیاں تے محلیاں توں گھن تے کوٹ لکھپت ،راوی ریاں تے لاہور دیاں کچی آبادیاں دے مزدوراں کول وی گھن ڳئے ۔ میݙی عمران خان نال پہلی ملاقات انہاں دے گھر زمان پارک اچ تھئی جݙاں انہاں کوں پتہ لڳا ڄو میݙا تعلق میانوالی نال ہے تاں انہاں دا میݙے نال پیاردا رشتہ ہور ودھ ڳیا ،میکوں ہمیشہ "گھنڄیرا یا ٹائیگر " دے ناں توں الیندے ہن تے میں انہاں کوں ہمیشہ خان صاحب آدھا ہم ۔

انہاں ݙینہاں اچ جناب فاروق امجد میرتحریک انصاف پنجاب دے صدر ہن( ڄہڑے مشرف دے دور حکومت اچ لاہور دے نائب ناظم بݨے تے بعد اچ جناب طاہرالقادری دی خالی کردہ سیٹ تے مسلیم لیگ( ق) دے ٹکٹ تے ایم این اے بݨے) انہاں دے مسلیم لیگ اچ شامل تھیوݨ توں بعد جناب راؤ رشید مرحوم کوں تحریک انصاف پنجاب دا صدر ٻݨا ݙتا ڳیا۔انہاں ݙیہاں اچ نوابزادہ محسن علی خان تحریک انصاف دے جہانگیر خان ترین دے علیم خان ہن۔او اکلوتے سیاسی رہنما ہن جہڑے آزاد حیثیت اچ ممبر صوبائی اسمبلی (صوبہ سرحد)منتخب تھی کے تحریک انصاف اچ شامل تھے ہن۔انہاں چار سالا ں اچ میں محسوس کیتا ڄو تحریک انصاف اچ نظریاتی کارکناں کوں او مقام حاصل نئیں جہڑا ہووݨا چاہی دا ہا ۔ ،سیاسی جلسیاں اچ معراج محمد خان جݙاں تقریر کریندے ہن تاں سکوت طاری تھی ویندا ہا ،انہاں دے خطاب توں بعد عمران خان دا خطاب متاثر نائی کریندا تے ویسے وی اس زمانے اچ عمران خان ایݙا چنگا مقرر وی کونا ہا ۔چنگا مقرر تاں او اج وی کونی پر منݨا پوسی ڄو لوک اوں کوں سݨدے ہن تے ترٹ کے سݨدے ہن ۔اوں زمانے دا عمران خان ٻہوں جذباتی ،ضدی،جارح، تے کناں دا کچا عمران خان ہا۔البتہ تحریک انصاف دے اجلاساں اچ ،ڄہڑے زیادہ تر عمران خان دے گھر زمان پارک اچ تھیندے ہن ،عمران خان سخت توں سخت تنقید برداشت کرݨ دی ہمت رکھیندا ہا،اندروں اندروں تاں ݙنݙ کپیندا رہندا ہا لیکن ردعمل دا اظہار نائی کریندا۔میکوں یاد ہے ایجھی صورتحال اچ عمران خان دے کن رتے تھی ویندے ہن پر سخت توں سخت ڳلاں تے او وی غریب توں غریب سیاسی کارکناں دیاں ڳلاں برداشت کر گھندا ہا۔ (مارکہ ڳل بات جاری ہے باقی وت)