تاج محمد گوپانگ دے ناں کھلا خط

صوفی تاج گوپانگ دے ناں کُھلا ۔۔۔۔۔۔۔۔ سئیں ہک ڈو گزارشات کرن چنہداں جناب دی خدمت وچ ، 1 ۔ اے گالھ درست اے جو 10 مئی کو سینٹ دی قائمہ کمیٹی وچ سرائیکی کوں قومی زبان بناون دا فیصلہ نئیں تھی سگیا ،پراے وی حقیقت اے جو سرائیکی سمیت ست زبانیں کوں قومی زباناں بنڑاون دا آئینی ترمیمی بل پیپلز پارٹی دے سینیٹر کریم خواجہ نے پیش کیتا ہئی پر اے بل سینٹ قائمہ کمیٹی قانون وانصآف نے حالی تک وی مسترد نئیں کیتا بلکہ ایں بل کوں چیئرمین کمیٹی سینیٹر جاویدعباسی آپڑیں صوابدیدی اختیارات استعمال کریندیں ہوئیں موخر pending کرڈتا ،تے ایں دی بجائے چار زبانیں کوں قومی زباناں بناون دا بل منظوری واسطے پیش کیتا ،جیہڑا ہی پی پی دے 2 سینٹرز سسی پلیجو ،عاجزدھامرہ نے سینٹ وچ پیش کیتا ہئی ۔ 2 ۔ مذکورہ ڈوہیں بل پرائیویٹ ممبر بل ہن تے پیپلز پارٹی دے بل نئیں ،کیوں جو پیپلز پارٹی دی ہک لیجسلیٹو کمیٹی اے جیندا چیئر مین فرحت اللہ بابر اے ،پیپلز پارٹی دا ہر بل سینٹ یا قومی اسمبلی وچ پیش تھیون توں پہلے لیجسلیٹو کمیٹی کوں بھیجا ویندے جیکر کمیٹی منظوری ڈیوے تاں بل ہائوس وچ پیش کیتا ویندے ،ایندے برعکس قومی زبانیں دے ڈوہائیں بل پیپلزپارٹی لیجسلیٹو کمیٹی کوں نئیں بھجوائے گئے ،بلکہ ڈائریکٹ سینٹ وچ پیش کر ڈتے گئے ۔ 3 ۔ سینٹ دی قائمہ کمیٹی وچ منظوری نال سندھی ،پنجابی ،بلوچی ،پشتو قومی زباناں ہرگز ہرگز نئیں بن گیاں بلکہ اے حالی سینٹ وچ منظوری سانگے پیش تھیونے جتھاں ڈوترہائی اکثریت چہیدی ہوسی ،سینٹ وچ منظوری دے ٹیم کئی وی سینیٹر اٹھی کے ترمیم پیش کرسگدے جو ایندے وچ 5ویں زبان سرائیکی شامل کیتی ونجے ،ول اے بل قومی اسمبلی وچ پیش تھیسی ، اُ تھاں وی کئی ایم این اے اٹھی کے ترمیم پیش کرسگدے ۔ 4 ۔ ایں پاروں اے گالھ درست کائنی جو قائمہ کمیٹی دے فیصلےبعد سینٹ دے ریکارڈ وچ سرائیکی دا ناں تھاں نئیں ریہا ،پیپلز پارٹی دی طرفوں 2013 وچ منظور کروائی گئی سرائیکی صوبے دی آئینی ترمیم ہنڑ وی سینٹ دے ریکارڈ تے موجوداے اونکوں موجودہ حکومت قومی اسمبلی وچ پیش کرکے منظور کرواسگدی اے ،جیکرچاہے تاں ! 5 ۔ سینٹ دی قائمہ کمیٹی دے 12 ممبر ان ،جیندے وچوں پیپلزپارٹی دے 4 ,ن لیگ دے 4 , پی ٹی آئی ،اے این پی ،ایم کیوایم دا ہک ہک ممبراے ، جے تلا کاوڑ پیپلزپارٹی تے کیتی بیٹھو اے تلا ن لیگ ،پی ٹی آئی تے وی بنڑدی اے ۔ 6۔ تہاکوں تاں صرف اے خبر اے جو ست زبانیں آلا بل سینٹ کمیٹی تو منظور نئیں تھی سگیا پر تہاکوں اے خبر کائنی جو سرائیکی سمیت ست زبانیں کوں قومی زباناں قرارڈیون دا بل 2016 وچ سینٹ وچ نامنظور وی تھی گیا ہئی ،اوں ویلھے وی اے بل سینیٹرکریم خواجہ پیش کیتا پر ن لیگ ،پی ٹی آئی دی مخالفت پاروں مسترد تھی گیا ہئی ،اوں ویلھلے کییں دی غیرت کیں نہ جاگی کہیں نوازشریف تے عمران خان دا پُتلا کیوں نہ ساڑیا! ۔۔۔۔۔۔کیا تساں یا کئی سنگتی ڈسا سگدے جو سینیٹرکریم خواجہ ول ول کیوں سرائیکی کوں قومی زبان بناون دا بل سینٹ وچ پیش کریندا کھڑے کیا او سرائیکی اے ،جی نہیں ،کریم خواجہ ٹنڈومحمدخان دا سندھی اے جینکوں سرائیکی بولن وی نئیں آندی ،آخر اے کجھ دوستیں دی سالیں دی مسلسل محنت ،کشٹ دا نتیجہ ہوسی جیہڑے مسلسل لابنگ کریندے رہ گیئن ،افسوس ایں گالھ دا اے جوکہیں نئیں سوچا جو ست زبانیں دا بل سینٹ وچ پیش کیویں تھئے ،تے اے وی کہیں نئیں سوچا جو ہک واری نامنظور تھیون دے بعد ول ست زبانیں دا بل جوسینٹ وچ دوبارہ پیش تھئے تاں ایندے مقابلے وچ تساں سبھ دے دوست پلیجو صیب دی بھتریجی کیندی لابنگ نال چار زبانیں آلا بل سینٹ وچ پیش کیتا ،کہیں پلیجو صیب کن فون کرکے پچھے جو اے کم۔کیوں کیتا گئے ،ایندے پچھوں کون ہئی ،کیاتہاکوں اے وی ملوم اے جو چار زبانیں دا بل جیہڑے سندھی دانشوریں سسی پلیجو دے ہتھوں پیش کروائے انہاں دا ہک پارٹنر ہک سرائیکی دانشور وی ہے ،جیہڑا بے تاں سبھے کماں وچ خود کوں جامی چانڈیو تے نصیرمیمن دا پارٹنر اہدے پر چار زبانیں آلے بل دے معاملے وچ گھئو چا مریندے ،سردار صیب جیکر پیرا چیسو تا پیرا نوابشاہ ،لاڑکانے دی بجائے کتھاہیں آپڑیں گھر نہ پج ونجے ۔ ساڈے دوست پیپلزپارٹی کوں پُنڑ لُنڑ دی بجائے کہیں سرائیکی سینیٹر کوں چار زباناں آلے بل دی منظوری ویلھے سرائیکی دے حق وچ سینٹ اچ ترمیم پیش کرن سانگے کیوں تیارنئیں کریندے ،ول پتہ لگ ویسی کیہڑی جماعت ایندی سپورٹ کریندی اے تے کیہڑی مخالفت ۔ 7۔ قومی زبانیں دے بل تے پیپلزپارٹی تے جے تلا کاوڑ کیتی ویندی پئی اے سمجھ توں باہراے اے ،اے وی کئی نئیں سچیندا جو 2013 دے الیکشن وچ سرائیکیں پی پی پی کوں جو طرا بدھوائے او تاں کئی یاد نئیں یاد کریندا ،ساڈے دوستاں کوں اوں ویلھے کئی کاوڑ نئیں لگی جڈانہہ پیپلز پارٹی دے ٹکٹ ہولڈر سرائیکی رہنما لوکیں کوں بلے کوں تیرسمجھ کے مہراں لاون دی تبلیغ کریندے رہ گئین ۔ 8۔ سردار صیب تہاکوں بہوں چنگی طراں معلوم اے جیکر پی پی پی 2013 دا الیکشن وی سرائیکی وسیب وچوں ہر گئی تاں پیپلزپارٹی دا انجام کیا تھیسی تے ایندے بدلے کون ساڈے اتے حکومت کریسی ،کیا تساں اوں بندے کوں وزیراعظم بناون چنہدو جینکوں مذاکرات سانگے طالبان آپڑاں نمائندہ نامزد کیتا ہئی ۔۔۔۔۔۔۔۔۔۔خدا نہ کرے جیکر پیپلز ہارٹی مک گئی تاں بیا کون اے جیہڑا تہاکوں سرائیکی صوبہ ڈیوے ،کیا اے سرائیکی قوم۔پرست جماعتاں ہک ایم پی اے ساکوں ڈے سگدین ؟؟؟؟ 9۔ سردار صیب اے جییڑے لوک تہاکوں تے عاشق بزدار کوں اج پیپلزپارٹی دے خلاف استعمال کریندے کھڑن کڈاہیں پچھیا ہیوے جوانہاں دی تنخواہ کتھوں آندی اے ؟؟؟؟؟؟؟؟؟؟

راݨا ابرار خالد