بندہ، بھاہ، ہوا تے پاݨی

لکھت: یوسف نون

"بندہ ،بھاہ ہواتے پاݨی" سئیں عبدالباسط بھٹی دا ݙوجھاافسانوی مجموعہ ہےـ ایں مجموعے وچ چھوٹے چھوٹے سولہاں افسانے شامل ہن. پہلے مجموعے: "وکاؤ چھانورا" طرانویں ایں مجموعے داناں وی ہک کلیدی افسانے اتے رکھیاڳئےـ سرائیکی نثر اج باسط سئیں دی بھارو ہے تے انہاں دی روہی دی ڈکشن تے محاورے نال سنگری نثرنے سرائیکی زبان کوں ثروت مندبݨائےـ بقول شخصے :"سرائیکی زبان باسط سئیں تے نازل تھیندی اے "زبان دی خاص چس رس جہڑی باسط سئیں داخاصااے، اے ڈکشن انہاں دے ایں افسانوی مجموعے وچ وی انویں ڄاپدی اےـ انہاں دا سب توں وݙاحربہ انہاں داذخیرہ الفاظ ، زبان داخاص ڈکشن تے قصہ گوئی ہے ـ باسط سئیں دیاں اے کہاݨیاں اساݙے اڳاڑے پچھاڑے تھیوݨ آلے روز دے واقعات ہن. فرق اے ہے جو انہاں ، نکے نکے واقعات کوں ہک تخلیق کاردی نظرنال ݙٹھے، تے انہاں کیتے کوئی عجب تکنیک ورتݨ دی بجائے ہک قصہ گو دے انداز وچ پیش کرݙتےـ باسط سئیں دے اندر ہک فنکار قصولی وی موجوداے جہڑا اساکوں قدیم قصہ گوئی دی روایت نال جڑیندے تے ایں روایت کوں اگوں دے ودھارا وی ݙیندے . انہاں دی نثر پڑھݨ دی اپݨی چس اے تے سݨݨ دی ہک ٻئی رس اےـ جہڑے افسانے انہاں توں سݨیے ہوئے ہن، انہاں کوں پڑھدیں اینویں ڄاپدے جوورقے دے پچھلے پاسوں باسط سائیں اپݨے مٹھے الا تے مخصوص جادوئی انداز وچ آپ الیندے پن ـ انہاں دا ہرافسانہ مقصدی ہوندے جہڑا مکدیں ہوئیں آخیروچ کوئی چیتے پتے دی ڳالھ اساݙے پلے ٻدھ ویندے ـ جینویں پہلے عرض کرچکیاں، جو انہاں دیاں کہاݨیاں زندگی توں نسردن تے انہاں دے کرداروی انہاں دے نت دے سنگتی ساتھی جاء ماحول دے ڄاݨیے سنڄاݨیے لوک ہن. او شمیم سئیں ہن، رفعت عباس سئیں یاول محمودمہے یا کوئی پیر، فقیر، ملاں بھوپا، کامریڈ، سردار ، پروفیسریاول ایجھاں کوئی ٻیا جینداجاگدا، ٹرداپھردا تے ڄاپداکردار ہوندے، جہڑا تھولے ٻہوں وٹاند پھیر نال اساݙے زندگی نال جڑیارہندے تے اوندا حصہ ہوندےـ جنہاں نال جڑیے چھوٹے موٹے واقعات، ڳالہیں کہیں ویلے ہک وݙا سبق ݙےویندن ـ انہاں دے سارے موضوع تے کردار اپݨے ماحول تےوسیب توں نسردن تے ایندا حصہ ہوندن ـ باسط سئیں جوکجھ ݙکھیندن او اساݙا اپݨا سݨہپ تے کڄھپ ہے ـ پہلے مجموعے وچ شامل "وکاؤ چھانورا" تے ایں مجموعے داکلیدی افسانہ "بندہ بھاہ ہواتے پاݨی" افسانے دے عالمی انتخاب وچ رکھݨ دے ݙادے ہن. اے افسانے اڄوکی نویں نکور "ماحولیاتی تنقید"(Ecocriticism) کوں ٻہوں سارامواد ݙے سگدن . اے ݙوہائیں افسانے ایں حوالے نال ہک انجھ مطالعے دے متقاضی ہن ـ

باسط سئیں دی نثر میں ورگے ہر طالب علم تے اپݨی ماء ٻولی نال پیارکرݨ آلے ہربندے دے پڑھݨ ݙا دی ہےـ انہاں دی افسانوی نثر جتھاں اپݨی ماء ٻولی دی اصل چس رس نال واقف کریندی ہے اتھاں اے اپݨے پڑھݨ آلے کوں فکری تے نظری سوجھل وی ݙیندی ہےـ