بلاول ہوراں تے تجزیہ

بلاول زرداری نال تھوڑے وقت دی ملاقت ءچ جہڑا میں نتیجہ اخذ کیتے او اے ء جو لفظ "[[سرائیکی زبان|سرائیکی]] " زرداری فیملی دی سیاست دا نہ سنجیدہ موضوع ہے تے نہ ہی ایں ویہلے کوئی ترجیہہ البتہ کل کوں مخصوص حالات ءچ وقت آوݨ تے لفظ سرائیکی کوں پنجاب ءچ بطور سیاسی ہتھیار استعمال کریسن جیندا ثبوت ݙاہ جون دے تمام قومی تے لوکل اخبارات ءچ ہِکے صفحے تے بہاولپور صوبہ بحالی دی حمایت تے سرائیکی صوبے دی یقین دیھانی موجود ہے پر ایں توں پہلے بہاولپور صوبہ دے کارڈ لاہوریاں وستے کھیڈݨ چاہندن تاکہ ݙوجھے پاسے پنجابی آبادکار کوں بھاولپور ءچ ہک سیاسی طاقت ور مستقل دھڑا انھاں دے ہتھ ءچ ہوے جیکوں سندھ دی سرحد دا فائیدہ وی ہے۔ ہُݨ باقی پنجاب تے وفاق کوں خوش رکھݨ کیتے لفظ سرائیکی کوں کڈھ تے جنوبی پنجاب دا نواں صوبہ تشکیل دا منصوبہ ہے جیھڑا جو ہک انتظامی یونٹ دا کم کریسی۔ پر پیپلزپارٹی دے ایں سارے مستقبل دے منصوبے ءچ سرائیکی قوم سرائیکی صوبہ تے ایں سیاسی ایشو تے پنجاب دی تقسیم دا دور دور تک کوئی نام و نشان کوئی نئیں۔ تے جیکر کݙاہیں سرائیکی عوام کٹھے تھی کراہیں پاور پلے دی پوزشن ءچ آ وی ڳئے تاں لگدے سب توں پہلے پیپلزپارٹی ہی سرائیکی صوبہ دے سوال تے اڳوں ولسی تے رکاوٹ بݨسی۔ تہوں انھاں ہک پاسی سینٹ ءچ سرائیکی کوں مسترد کرتے صرف پنج زباناں کوں قومی زبان یا ریست دی قومی زباناں دا بل پاس کیتے جو آئیندہ کڈھایں وی سرائیکی صوبے دا آئینی تے قانونی جواز نہ رہوے تے ݙوجھے پاسوں سرائیکی صوبے دے سیاسی سوال دے تابوت ءچ چھیکڑی کِل ٹھوکݨ کیتے بھاولپور صوبہ دی بحالی تے جنوبی پنجاب صوبہ دا ایجنݙا مکمل ء کیوں جو ایندے نال وفاق راضی تھیندے ـ سرائیکی دھرتی اتے قوم کوں تقسیم کریندے ہوئے بھاوپور دے پراݨیں مقامی ریاستیاں تے نویں طاقتور پنجابی ابادکار سیاسی کاروباری اشرافیہ کوں خوش کریندے ہوئے پنجاب ءچ طاقتور چھوٹا پنجاب بݨیسن ۔ جنوبی پنجاب دا مطلب پنجاب ء نہ کہ سرائیکی صوبہ ۔ تہاکوں یاد ہوسی جو سب توں پہلے جنوبی پنجاب تے بھاولپور صوبہ بحالی دا اے فارمولہ فوج نے یعنی پرویز مشرف نے اپݨی کئی تقاریر ءچ ݙتا ہا جیکوں بعد ءچ قاف لیگ دے چوہدری برادران اپݨے منشور ءچ شامل کرتے باقاعدہ اعلان کیتا ہا تے دبی دبی آواز ءچ بھاولپور دے ن لیگی لیڈرز اپنی تقریراں تے جلسیاں ءچ وی ایہا آکھدے ہن ـ پیپلزپارٹی نے وی تہوں فوج دے آکھݨ تے مائنس سرائیکی ݙوصوبیاں دی تجویز من تے ایوان ءچ اپݨی کاروائی کیتی کیوں جو اے اسٹبلشمنٹ دا فیصلہ ہا لہٰاذا ایندی پیروی کرݨ وفاقی پارٹیاں تے لازم ہے۔ سرائیکی صوبہ دا قیام اڄ دے ݙینہہ پاکستان دی کہیں وی وݙی مین سٹریم پارٹی دا ایجنڈا ہی کوئی نئیں۔ صاف ظاہر ہے جو سرائیکی صوبہ آپے مُک ویندے جیہڑیلے ہک ٻاںہہ تے ہک لت کپ تے آکھو" شاباش ہُݨ پِن ودا"۔۔۔۔۔۔۔ پیپلز پارٹی کوں ایندا ہک وݙا فائیدا اے ہے جو سندھ ءچ آباد نسلََا بلوچ تے ثقافتی اعتبار نال سندھیاں توں وکھ ابادی دے تناسب ءچ ڈھیر سرائیکی ہن ڄہڑے جو کل کوں سرائیکی ہوݨ دے ناطے سندھ کنیں علہیدگی دی بنیاد تے سرائیکی صوبے نال شمولیت دی تحریک بݨ سگدی ہے جیندا ٹھِکر پیپلزپارٹی اپݨے سِر تے بھنݨ نئیں چاہندی ۔

شہزاد عرفان