اُٻالھ اَنت نہیں

کویلی کوں جݙاں وی میں ݙٹھے ہر وقت اُٻالھ وچ ہوندی ہے، پتہ نئیں کیڑھا اینجھا ضروری کم ہوندے جیندی وجہ کنوں او اتنی پریشان ہوندی ہے، جے اساں اے سمجھ سڳدے جو کویلی کوں اے کائنات اتنی وݙی لڳدی تاں شاید ساکوں وی کجھ پتہ لڳدا ویندا جو کیڑھا اینجھا ضروری کم ہے جیڑھا اساں وساریا ہوئے۔ کم از کم کویلی کوں اے پتہ ہے پیا جو کیڑھا ضروری کم ہے جیڑھا اوں مُکا کے آرام کرنے یا پتہ نہیں ارام کرݨا اِی ہے یا کائناں۔ تساں جتنا وقت اونکوں تکی رکھو او ایڈے اوݙے بھوہندی راہسی، اَخیر تساں تھک ویسوں پر اِیں ڳالھ دا پتہ وَل وی نہ لڳ سڳسی جو او کیڑھا ضروری کم ہے جیڑھا کیڑھا اونکوں ہک جاہ تے ٹِک کے نہیں ٻہݨ ݙیندا۔ ایندے مقابلے اِچ وݨ کوں تاں لڳدے جو اونکوں کوئی کم اِی کائنی۔ بس چُپ کیتی ہکی جاہ تے کھڑے تھیا۔ نہ کوئی فکر نہ کوئی۔ ہا البتہ ہوا گُھلے تاں آپو آپ جھمر پاوݨ شروع کرݙیندے یا رُت بدلے تاں اپݨا رنگ بدلاوݨ شروع کرݙیندے۔ اے ٻئی ڳالھ ہے جو لوک اوکوں ݙیکھ تے کہیں ویلے خوش تھی ویندن تے کہیں ویلھے مونجھے او خود کہیں نال اَلیندے کہیں کوں آپ دو سݙیندے، وَلا اینویں تھیندے جو چُپ چپاتے سُکݨ پئے ویندے۔ ہر ڳالھ اینویں نہیں او سب کجھ ڄاݨدے اونکوں رُت بدلݨ توں پہلے پتہ لڳ ویندے۔ چیتر اِچ اوندی کھِل کہیں کنوں ڳُجھی نہیں رہندی۔ اوندی ہاڑ دی ہاچُپ تے پوہ دارووݨ تے چُپ چپاتے پترے کِرݨ کہیں دے کلھے ٻہہ کے ہنجوں وہاوݨ کنوں مختلف تاں نہیں ہوندا۔ اینویں لڳدے جو جیوݨ دے سارے ُگجھ رَمزیں کوں جتلا او ڄاٹدے جے بندہ ڄاݨدا ہوندا تاں اتنا صبر وی ہوندے وچ ہوندا۔ ایہا وجہ خدا جیڑھے محلیں، مسیتیں، مندریں تے کلیسائیں وچ نہیں لبھدا تاں کہیں گھاٹے ٻوہر دے درخت ہیٹھ لبھ ویندے نہ تاں گیا تے کپل وداستو خدا دی ایں دھرتی کنوں تاں ٻاہر تاں کائنی۔ آخر ٻُدھ کوں جے ٻہوں اُٻالھ ہوندی تاں کویلی تاں اونکوں اپݨے گھر وچ لبھ سڳدی ہئی۔ ساکوں جو اِتلی اُٻالھ ہے کتھائیں اساں جیوݨ کوں کویلی دی اَکھ نال نہیں ݙیہدے پئے۔۔ ۔ ۔