اُستاد محمد ابراہیم

اُستاد محمد ابراہیم (انگریزی: Master Muhammad Ibrahim) (ڄَمَّݨ دی تَرِیخ: ١٣ جون ١٩٢٠ء ۔ فوت تھیوݨ دی تَرِیخ: ٣ مئی ١٩٧٧ء) سندھی زبان دے لوک ڳائیک ہَن۔

ابتدائی اَتے کَم کار آلی حیاتی

محمد ابراہیم ١٣ جون ١٩٢٠ء کُوں برطانوی ہند دے گجرات دے ضلع کچھ دے سلیا دِیہ وِچ ڄَمّے ہَن۔ محمد ابراہیم ١٩٤٢ء وِچ ٢١ ورھیاں دی عُمر وِچ برطانوی ہند دے گجرات دے ہِک دِیہ تُوں کراچی ٹُر ڳئے۔

اِنّھاں نے ١٩٤٨ء وِچ کراچی دے ریڈیو پاکستان وِچ شمولیت اختیار کِیتی۔ بعد وِچ ١٩٥٥ء وِچ، محمد ابراہیم بطورِ نغمہ نگار ریڈیو پاکستان، حیدر آباد ٹُر ڳئے۔

آکھیا وین٘دا ہِے جو اُستاد منظور علی خان، اُستاد محمد ڄُمَّݨ اَتے اُستاد محمد ابراہیم نے ١٩٤٧ء وِچ پاکستان دی اَزادی دے بعد ابتدائی ݙیہاڑیاں وِچ نویں رجحاناں اَتے اسلوب طے کر تے سندھی موسیقی وِچ انقلاب برپا کر ݙِتّا۔

٢٠١٦ء وِچ، کراچی وِچ اُنّھاں دے ٣٩ ویں ورِھیݨے  اُتّے، آرٹس کونسل آف پاکستان نے اُنّھاں کُوں خراجِ تحسین پیش کرݨ کِیتے ہِک پروگرام دا اہتمام کِیتا ہئی۔

اِنامات اَتے سُن٘ڄاݨ

اُستاد محمد ابراہیم کُوں ٢٠٠٧ء وِچ (اُنّھاں دے مرݨ دے ٣٠ ورھیاں بعد) شاہ لطیف ایوارڈ نال نوازیا ڳیا۔ اِیں تقریب وِچ اُنّھاں دے پُتر نے دعویٰ کِیتا جو اُستاد محمد ابراہیم اُنّھاں ڳائیکاں وِچُوں ہِک ہَن جِنّھاں نے پاکستان وِچ ریکارڈ کِیتا ون٘ڄݨ آلا پہلا قومی ترانہ ڳائیا ہئی۔