امتیاز ساغر

اصل ناں       ملک امتیاز احمد

قلمی ناں       امتیاز ساغرؔ

جٖمنْ           1982ء

تعلیم           اَنْ پڑھ

پیشہ            زمیندارہ

فون نمبر        0311 4743322

جاہ پتہ         جھوک شیخاں والی ،ڈاکخانہ درابنْ تحصیل پروآ ضلع دیرہ اسماعیل خان

امتیاز ساغرؔ یکم جنوری 1982ء کوں ملک عالمشیر دھپ دے گھر پیدا تھئے ۔ جڈٖاں جو 1998ء کنوں ضلع لیہ دے شاعر جاوید حسین جاویدؔ دی راہنمائی وچ اپنْی شاعری دا آغاز کیتا۔نمونہ کلام حاضر ہے۔

غزل

نہ ونجٖ تسبیح دی ٹھک ٹھک تے عمل پرکھنْ ضروری ہے

اِتھاں اِبلیس بٖہوں وسدن، شکل پرکھنْ ضروری ہے

زمانہ رنگ برنگا ہے ایویں عتبار چنگٖاں نئیں

توں سسّی تھل دی سسّی ہیں پنل پرکھنْ ضروری ہے

نسے محفوظ گھریں وچ ایجھیں حالات تھی گٖئے ہن

جے بٖہروں در تے سڈٖ تھیوے ہکل پرکھنْ ضروری ہے

کتھئیں تیڈٖے وی کم آسی میڈٖی اے گٖالھ پلّوں بٖدھ

نقل پرکھنْ ضروری نئیں اصل پرکھنْ ضروری ہے

ایویں ساغرؔ لکھیندی نئیں غزل تاں ڈھیر اوکھی ہے

غزل لکھنْاں ضروری نئیں غزل پرکھنْ ضروری ہے