الطاف ملک

اصل ناں       الطاف احمد

قلمی ناں       الطاف ملک

جٖمنْ           1994ء

تعلیم           ایم فل (کمپیوٹر)

پیشہ            معلم

فون نمبر        0300 9673468

جاہ پتہ         امین گٖڑھ خاص، ضلع رحیم یار خان

غزل

لوکیں اپنْے فوجیں کوں امداد اچ غزلاں لکھیاں

اساں گھر دے پھُل بٖوٹیں دی یاد اچ غزلاں لکھیاں

تہذیبیں سر چاونْ لو نیزیں دا آسرا گھدا

فطرت ایرے جھکے کر بنیاد اچ غزلاں لکھیاں

ڈٖکھ ملیا تاں اپنْے آپ دا مرثیہ پڑھ ، رُنّے

سکھ ملیا تاں کھل تے تیڈٖی یاد اچ غزلاں لکھیاں

ہجر دی رات مشاعرہ کیتا دردیں شعر سنْائے

اساں ویل اچ مصرعے گھولئے داد اچ غزلاں لکھیاں

عشق دے شرک دی سرحد وچ ہے فرق الطاف معمولی

نعت غزل دی بندش وچ ، میلاد اچ غزلاں لکھیاں

٭٭٭