اقبال ہٹھاڑی

اصل ناں      محمد اقبال

قلمی ناں       اقبال ہٹھاڑی  

جمن           1958ء  

تعلیم          ۔۔۔۔۔ 

پیشہ           سکول ٹیچر 

فون نمبر       ۔۔۔۔۔۔

جاہ پتہ        سٹلائٹ ٹاؤن احمد پور شرقیہ

اقبال ہٹھاڑی صاحب زبر دست خدا داد صلاحیت دے حامل فطری شاعر ہن،ادب دے میدان اچ بہوں دیر نال قدم رکھئے نیں ،لیکن بہوں تیزی نال اگوں تے قدم ودھیندے پئین ۔انہاں دی زبان خالص تے تخیلات دی پرواز بہوں بلند ہے اوہ شاعری اچ اپنے تل وطنی محاورے تے اصطلاحواں وڈی خوبصورتی نال استعمال کریندن۔ایندے نال نال وسیب دے نا پھر تے مظلوم طبقے دی زبوں حالی ڈیکھ تے کڑھدن۔جڈاں جو مزاحمت انہاں دی شاعری دا خاص موضوع ہے۔آؤ انہاں دی ہک مزاحمتی غزل دا نمونہ ڈیکھو!

(1) غزل

لہو میڈا تیڈے شرابیں دے اندر

میڈا ماس تیڈے کوابیں دے اندر

میکوں رات لگدی ہے سوچیں دی سولی

میڈا ڈینہ گزردے عذابیں دے اندر

تیڈے ہتھ قلم ہے ،تیڈے ہتھ ہے کاغذ

جو لکھدیں لکھی رکھ نصابیں دے اندر

حیاتی گزاروں کیویں تول تک دی

عجب ان پھتھاہاں حسابیں دے اندر

محل ماڑ خالی ایں دولت کنوں ہن 

وفا گول خانہ خرابیں دے اندر

(2)غزل

کے تئیں مندڑے رہسن حال غریبیں دے

ربّا ہُن تاں ڈکھڑے ٹال غریبیں دے

جتّی پالش  کرن  کیتے پکڑن  پیر

جیندیں جی مر ویندن بال غریبیں دے

ٹکر پورا کائنی تھیا اج توڑیں

توڑے سروں لہہ گئے وال غریبیں دے

وستی  دے  مودی دا  قرض  نئیں لتھا

بھانے سودھے مک گئے مال غریبیں دے

منجھیں چاروں اساں ،کتّے ڈدھ پیون

کیجھے بھیڑے حال اقبال غریبیں دے

________________

گوہے سستے کائنی رہ گئے البتہ

گوہے مُل انسان وکاؤ ہے گھنسو سئیں؟