اقبال بابر

اصل ناں       بابر اقبال

قلمی ناں        اقبال بابرؔشاہ

جٖمنْ           1969ء

تعلیم          بی اے

فون نمبر        0346 3007372

جاہ پتہ        وستی کوتانْی تحصیل تونسہ شریف

شعری مجموعہ ’’سروپ‘‘ دے خالق اقبال بابرؔ شاہ یکم اکتوبر 1969ء کوں سید عطاء اللہ شاہ دے گھر وستی کوتانْی تونسہ شریف اچ پیدا تھئے،1992ء کنوں شاعری کریندے پئین ، جڈٖاں جو سرائیکی دے مایہ ناز شاعر شفقت بزدار توں اصلاح گھندن۔اقبال بابرؔ بنیادی طور تے غزل گو شاعر ہے ، تے غزل دے موڈ مزاج کوں سمجھدے ۔ اوہ جڈٖاں اپنْی غزل وچ محبوب نال مخاطب تھیندے تاں آپنْے آپ کوں محبوب دے سامنْے ابتر حال زہیر مجنوں دے روپ اچ پیش کریندے تے آہدے۔

؎ہن میڈٖے وال میڈٖے حال دے شاہدبابرؔ

نال پپلیں دے تیڈٖی خاک ہے چھانْی لکھاں

(1)غزل

تیڈٖا نکھڑنْ میڈٖا جانی سزا محسوس تھیندا ہے

وجود اپنْاں میکوں من دے سوا محسوس تھیندا ہے

حقیقت اے ہے میں ایں دور دا یوسف نمہی لگٖدا

مگر ہر شخص یوسف دا بھراء محسوس تھیندا ہے

سمجھ وچ کائنی اَئی میڈٖی ، سماعت وچ ترنّم کیوں

ایویں کجھ دیر توں اوندا الا محسوس تھیندا ہے

میڈٖے سر تے میڈٖی امڑی دا سایہ رہ ونجٖے شالا

اوندا دڑکا میکوں بنْ کے دعاء محسوس تھیندا ہے

میڈٖے اندر دا شاعر وی سجٖنْ دے حسن دا صدقہ

غزل تخلیق تھیونْ تے خدا محسوس تھیندا ہے

نظر دے نال اوں بابر ؔ ایویں نظراں ملایا ہن

جے اکھ نوٹاں تاں اکھ کوں سوجھلا محسوس تھیندا ہے

(2)غزل

ہے دیگر دے پلکیں تے پل دی نماشاں

کوئی آ کے ڈٖیکھے ہا تل دی نماشاں

توقع کنوں وی زیادہ اندھارے

ہے زلفیں دا سایہ کجل دی نماشاں

ہے دھرتی دا جٖایا سحر دا ستایا

سحر دا مقدر ازل دی نماشاں

تیڈٖے چِٹّے رخ تے تیڈٖیاں کالیاں زلفاں

ڈِٖٹھی میں فجر نال رلدی نماشاں

اے تھی سگٖدے اقبالؔ،شفقت دے ہوندیں

ڈٖوپہریں کوں آکھوں غزل دی نماشاں

جے اجٖ دیر کیتو تاں بابرؔ نہ بچسوں

اگٖے بٖہوں ستایا ہے کل دی نما شاں

٭٭٭