اعتراض کیوں ؟

پنجاب ٹیکسٹ بک بورڈ مارچ 2015ء اچ اٹھویں کلاس دی کتاب ’’ جغرافیہ ‘‘ شائع کیتا۔ کتاب دے آخری صفحے تے پاکستان دا تہذیبی تے ثقافتی نقشہ شائع کیتا۔  نقشے دے نال حکومت پنجاب دا مونو گرام وی لاتا ڳے۔ نقشہ اچ گلگت بلتستان ، خیبرپختونخواہ، ہزارہ ، فاٹا، بلوچستان ، سندھ ، سرائیکستان تے پنجاب درج ہے۔ کتاب دی اشاعت دے بعد وسیب دے لوک ݙاڈھے خوش تھئے تے پنجاب ٹیکسٹ بک بورڈ کوں مبارخاں بھڄوائیاں جو ایں پہلی دفعہ پاکستان دا صحیح تہذیبی نقشہ شائع کیتا پر لاہور دا متعصب میڈیا آکھیا جو ایہ ملک دشمنی ہے۔ اساں آکھیاجو اگر سرائیکستان پاکستان دے نقشے دے اندر ہے تاں سوہݨی ڳالھ ہے، جے ٻاہر ہے تاں غداری ہے۔ اساں ایہ وی آکھیا جو ہُݨ سرائیکستان کوں پاکستان دے نقشے توں ہٹایا ڳیا تاں ایہ ملک دشمنی ہوسے۔

پاکستان دے نقشے اچ شامل کیتے ڳئے سرائیکستان دی شمولیت تے طوفان چؤ ڳیا ۔حالانکہ ایں نقشے اچ ہزارہ ، فاٹا وغیرہ وی شامل ہَن ۔ حکمرانیں کوں انہاں تے اعتراض کائنا ہا۔ ظلم دی ڳالھ ایہ ہے جو پنجاب اسمبلی اچ اپوزیشن لیڈر تحریک انصاف دے رہنما محمود الرشید وی پنجابیت دا ثبوت ݙیندے ہوئیں پنجاب اسمبلی اچ تحریک التوا جمع کرائی جو نقشہ شائع کرݨ آلیں دے خلاف کاروائی کیتی ونڄے۔ پنجاب دے وزیراعلیٰ میاں شہباز شریف ایں مسئلے تے خصوصی اجلاس سݙیا تے اعلان کیتا جو ایں مسئلے تے جوڈیشل کمیشن بݨسے ۔ ایں تے اساں وی اعلان کر ݙتا جو تُساں جوڈیشل کمیشن بݨاؤ ، اساں وی فریق بݨسوں تے ثابت کریسوں جو غدار او کائنی جنہاں سرائیکستان کوں پاکستان دا حصہ ݙکھایا بلکہ غدار او ہِن جیڑھے سرائیکستان کوں پاکستان دے نقشے توں حذف کرݨ چہندن ۔ اساں ایہ وی اعلان کیتا جو ایہ نقشہ جنہاں لوکیں رَلایا ہے اساں انہاں کوں پُھلیں دے ہار پویسوں ۔ او پاکستان دے ہیرو تے سرائیکستان دے محسن ہِن ۔ اساں احٖ تئیں جوڈیشل کمیشن دا انتظار کریندے پیوں ، حکومت اپݨے اعلان توں بھڄ ڳئی ہے۔

کتنے افسوس دی ڳالھ ہے جو پنجاب حکومت پاکستان دے نقشے اچ سرائیکستا ن دی شمولیت تے ہوچھے ہتھکنڈیں تے آ ڳئی ہے تے ایں ٹیکسٹ بک بورڈ دے چھوٹے اہلکاریں دے خلاف کاروائیاں شروع کر ݙتیاں ۔ انہاں کوں ملازمت توں برطرف کر ݙتا تے صرف اتنا ای کائنا بلکہ گرمیں دی چھٹیں دے باوجود محکمہ تعلیم اچ ہنگامی حالت دا اعلان کر تے او جغرافیے دی کتاب جیں اچ سرائیکستان دا لفظ آ ڳیا ہا ، ہک ہک کر تے گھروں چؤائی ڳئی ۔ دوکانیں تے چھاپے مار تے کتاباں چؤائیاں ڳیاں ۔ ایہ سارا کجھ ایویں کیتا ویندا پے جیویں پاکستان دے نقشے اچ سرائیکستان نہ اسرائیل وڑ آیا ہووے ۔ ول پنجاب ٹیچرز تے ایں طرح دے سرائیکی دشمنی تے بݨݨ آلی استادیں تنظیمین دی طرفوں بیان چھپوائے ڳئے جو کتاباں ضبط کرو جو پاکستان دے نقشے اچ سرائیکستان کیوں آیا ہے ؟ اساں آکھیا جو شرم کرو تے سرائیکی قوم دا شکریہ ادا کرو جو او پاکستان دے اندر رہندے ہوئیں صوبہ منگدے پِن ۔ بلوچستان اچ کیا تھیندا پے، اتھاں دے سکولیں اچ قومی ترانہ کیوں بند ہے ؟ سندھ توں کیا آوازاں امدیاں ہِن ۔ الطاف حسین مدد کیتے بھارت کوں کیوں سݙیندا پے ؟ خیبرپختونخواہ آلے تاں پاکستان تے افغانستان وچ ڈیورڈ لائن کیوں نی منیندے ؟ لاہور آلیں دے دل سرائیکی وسیب یا پاکستان دی بجائے مشرقی پنجاب دے نال کیوں دھڑکدن؟ شرم کرو جیڑھے پاکستان نال محبت کریندن تُساں انہاں کوں پاکستان دے نشے وچوں آؤٹ کرݨ چہندو۔ لاہور آلیں دی پاکستان دشمنی دے خلاف سرائیکی جماعتیں احتجاج دا فیصلہ کیتا۔ ایں سلسلے اچ سرائیکستان قومی کونسل تے اٹھ جماعتیں دے اتحاد سرائیکستان عوامی اتحاد جاہ جاہ احتجاجی مظاہرے کیتے ۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ