اظہار تشکر

تھینک یو:ـ جناب نورمحمد تھہیم ایڈووکیٹ سموری بار تے خان پور دے سارے قابل احترام دوستیں دے نانویں۔نظم نِمہیں لِکھدا میں خط پیا لِکھیداں۔جیویں الینداں اویں کاغذ تے لِکینداں۔تُساں ساہ ساہ دے سنگ سنگت جوڑی۔پیت پریت دی ریت بنڑائی ۔تُساں دریا دا لیکا جھاگیا۔ساڈی خاطر دعا دے بُگ جوڑ بنڑایا کاسا۔جہڑا خاصہ معتبر عمل اے ساکوں ودھیک بھانڑاں۔ہر ہِک نِمانڑاں بندہ خدا دے اگوں ہتھ اڈیندے۔تُساں وی اَڈیئے۔ گال ہِک سمجھ نہیں آئی جو تُساں ہِکی سہی اِچ خُدا کنوں منگیے تے ہِکے لہذے نا خُدا دے اگوں ساڈی خاطر پلو اڈیئے۔اے گال سچ اے جو تہاڈا ساڈا ساہ دا سانگھا مُل مہانگا ۔ایویں کُر تے یار نئیں بنڑدے ،وقت لگدے ۔ہاں نِکلدے تاں ناں نِکلدے۔اساں میت پریت دے اینجھے زائچے جوڑوں جو پار اُروار وچ فرق نہ آوے۔پار والیں کوں چھمک لگے تاں اُروار ولیں دی کنڈھ تے پھلوہیں پئے ڈِسسِن۔اے ٹھیک اے ریاست ماء ہوندی اے۔ اتھاں پاک سرزمین دے اُتے مئی اے پر مترائی اے ۔تُساں ریاست کنوں ساڈی خاطر پیسے نہ منگو۔ تُساں آکھو مِسنگ پرسن کتھ اِن۔ رِدھ تے کھا گیو دریاویں لُڑھ گِن یا پتھر پہاڑ دا رزق بنڑیِن۔تُساں ساڈی خاطر کجھ نہ منگو۔ تُساں اے پُچھو جو ایہے پہلوں ہَن پے۔پہاڑیں اندر رہندے نانگ لتاڑ تے مال چریندے سوہنڑے لگدے ہَن۔الغُرزہ دی تار اُتے چوٹیاں رقس کریندیاں ہِن۔ مئی مشین مخبری کیتی وچوں نِختے سونا جِپسم تیل پٹرول بیاں لا محدود دھاتاں بلوچیں کیتے اللہ سئیں دی طرفوں خاص الخاص براتاں سونا چاندی ڈیکھ تے یار اُبھے چڑھ گالہے تھی گے۔ راتوں رات سارے بُگٹی، مری، مسوری تے گشکوری دیش دروہی تھی گئے۔مارو مارو مُلک دے دشمن۔ بند بوری اِچ سانبھ تے رکھوں میڈے زہین یارو تُساں ساڈی خاطر نہ اڈڑاں ہا۔تہاڈے ہتھ خُدا بنڑاۓ ہَن دعا دی خاطر۔سیانڑے لوکو کڈھیں قضا دے ہتھوں شفاء مِلی اےـ وکیل مانڑوں التواء دے عادی عزرائیل کولوں ساڈی خاطر التوا وقفہ نہ منگو۔ موت مرسی اساں نہ مرسوں۔ خاطر جمع رکھو۔ پنڈت دے گھر خُدا نہ گولو۔کُچلے دی ہٹی دے اگوں کھڑ تے۔پرافٹ دے پِٹیے سیٹھ دے کولوں دریاق پئے پُچھدو۔ ساڈی تحریک محکوم لوگیں دی پُر امن تحریک اے ۔اساں غلولی نال ہِک پتھر نئیں اچھالیا دشمن دے گھر ڈو۔ ساڈے وینڑ کوجاں ولیندین۔ ساڈے نوحے چپڑیں دے چِلکارے تے چیڑیں دی چوں چوں ساڈا جلسہ۔ دول نغارے ساڈے راکٹ لانچر۔ سِندھو سئیں اِچ ٹھِلدیاں بیڑیاں ساڈے ہاتھی گھوڑے۔ جُھمر صوبہ جوڑے۔ (صوفی تاج گوپانگ) (لِکھت: ملک غلام عباس ببر)