اسوں پنجوں
اسو پنجو
ایں کھیݙ وچ پنج کھݙکار کھیݙ سڳدن. اتے انہاں دے ناں رکھیے ویندن. انہاں دے جیہڑے ناں رکھیے ویندن او ہیٹھاں ݙتے کھڑن ١. اسو ٢. پنجو ٣. ھار ٤. کبوتر ٥. ݙولی پنج کھݙکاراں دے اے پنج ناں رکھݨ توں بعد سارے کھݙکار ہتھ ملا تے یعنی ہتھ کٹھے رلا ݙیندن تے یک دم چھوڑ ݙیندن تے بھوئیں تے رکھ ݙیندن. اتے جݙاں ہتھ بھوئیں تے رکھدن تاں چمبا کھول ݙیندن. انہاں وچوں کئی پنجے انگلیں سامݨے کریندے کئی ݙو تے کئی ہک انگل رکھدے. اوں توں بعد کئی ہک کھݙکار ہر انگل تے ہتھ رکھ تے ایں تندیر وچ آہدے ویندا. اسو پنجو ھار کبوتر ݙولی، اسو پنجو ھار کبوتر ݙولی. جتھاں انگلیں مک ویندین اتھا جیہڑا ناں وی ھا او جت ویندے ول باقی چار کھیݙدن تے ول اوہو کھݙکار ول پنجے ناں گھندے ویندا تے انگلیں تے ہتھ رکھیندے ویندا ول جتھاں انگلیں مک پوسن ٻیا کھݙکار پڳ ویسی. مثال دے طور تے پہلے بندے ݙو، ݙوجھے نے پنج، تریجھے نے ہک چوتھے نے وی ہک پنجویں نے چار انگلیں رکھین اے کل تیراھاں انگلیں بݨڑدین تے اسو پنجو دے ݙو چکر پورے تے ول تریجھے ناں تے انگلیں مک ڳیاں مطلب تریجھا ناں ھ، ھار تاں ول ھار پڳ ویسی پچھوں چار کھݙکار بچ ویسن. ول اے چار بندے انگلیں تلے رکھسن. ھݨ پہلا بندہ ہک، ݙوجھا، ترائے، تریجھا ول ہک تے چوتھا ترائے انگلیں رکھیس تاں ول اے ھار تے انگلیں مکسن، ھار پہلے پڳ گے ایں وجہ توولا انگلیں رکھسن، جݙاں اے انگلیں کہیں ٻئے ناں تے مکسن او پڳ ویسی ایویں سارے پڳ ویندن تے چھیکڑی ہک بندہ بچسی. جیہڑا چھیکڑی ہوسی او معافی منگݨ وانگ ہتھ ٻدھ ٻاہسی تے باقی واری وار اوندے ہتھاں تے تھپڑ مریسن، جݙاں جو ہرݨ والا اوں تھپڑ کول اُک چُک کریسی. جݙاں تھپڑ چک ویسی ول ٻئے دی واری آسی ول ٻئے دے تے ول چوتھے دی. کجھ جاہیں تے اے وی کار ہوندے جو تھپڑ پہلے مکا گھندن مثال دے طور تے ہر بندہ ݙاہ تھپڑ مریسی انہاں ݙاہ تھپڑاں وچوں وی ہرݨ آلا پہلے چکا ونجے تاں اوں بندے کول جند چھٹ ویندی ھ. اتے تھپڑ پورے تھیوݨ یا ساریں دی واری مک ونجݨ دے بعد کھیݙ ول مُݨ مُنݙھوں شروع تھی ویندے ھ. اتے اے سلسلہ ایویں چلدے پیا