استاد خمیسہ

اے ہے استاد خمیسہ

وستی خواجہ دا وسوں واݨ اے۔۔ وستی خواجہ راڄن پور کنوں لڳ بھڳ 20 کلو میٹر سجھ ابھار تے سن٘دھ دریا کنوں 2 میل اورہوں ہے۔ وستی خواجہ دی سن٘ڄاݨ سید ایوب شاہ فیاض سئیں ہن ۔۔۔ عوامی مزاج دی سوہݨی شاعری کرین٘دے ہن ۔۔۔ سرائیکی دے معتبر شاعر سئیں جن٘دوݙہ مغموم وی وستی خواجہ وِچ ڈھیرا ویلھا گزاریا ہا ۔۔۔ استاد خمیسہ من٘ڈھ لا کنوں سخن سن٘ڄاݨ تے سُر گُر دا استاد ہے ۔۔۔ جئیں ویلھے ملدے کھلدا ملدے ۔۔۔ زور دا الین٘دے ۔۔۔ زوریں نال چان٘ہہ پلین٘دے ۔۔۔ دل نال ڳاوݨ سݨین٘دے ۔۔۔ بھان٘ویں جو اساݙے طبقے دے ٻنہاں پورہیتاں وان٘گوں استاد خمیسے وی بُکھ دے رڄ کیتن پر اوں کݙہیں زندگی، تے حالات دا شکوہ نئیں کیتا ۔۔۔ ہمیشاں تراہکے مار کھلدے تے مون٘جھے مان٘دے لوکیں کوں کھلݨ دی ݙات ݙین٘دے ۔۔۔ استاد خمیسہ ، سئیں عاشق خاں بزدار دے ناں تے وکاݨاں ہویا جوان اے ۔۔۔   استاد خمیسہ مال پال تے گزر گزران ٹورین٘دے ۔۔۔ جݙاں مہرے والا دا سرائیکی میلہ سِر تے آ ون٘ڄے تاں استاد خمیسہ میلے تے پُڄݨ سان٘گے مال ڈھڳی دا گھا کٹھا کرݨ کیتے ݙو ݙین٘ہہ اڳاتری تݨ مارݨ شروع کرین٘دے ۔۔۔ مال ڈھڳی دا رزق کٹھا کر ۔۔۔ چوݨیں کوں تیل مکھ تے استاد خمیسہ مہرے والا دے سرائیکی میلے تے انت پُڄدے ۔۔۔ سرائیکی میلے دی سٹیڄ تے حاضری ۔۔۔ یا مقدر یا نصیب ۔۔۔ اتھائیں میکوں ہک واقعہ یاد آ ڳئے جو راڄن پور دے وِچ ہک وݙی شادی ہئی تے جاڳے تے راڄن پور دے مہان٘درے تے رڄ کڄ والے سیاسی لوک وی موجود ہن ۔۔۔ سٹیج تے کجھ مہاندرے لوکیں دیاں کرسیاں ہن ۔۔۔ سئیں عاشق خان بزدار سئیں کوں وی میزبانیں آدر ݙتا تے سٹیج تے ون٘ڄ ٻلہایونے ۔۔۔ عاشق خان بزدار دی دید پئی تاں کیا ݙیہدے جو کرسیاں دے پچھوں زمین تے ݙو ترائے آدمی ٻیٹھن ۔۔۔ انہاں نِجھا تے ݙٹھا تاں انہاں کوں پہلے تاں بھلان٘درا تھیا ول پک تھی ڳیا جو اتھاں سرائیکی وسوں دا معتبر حوالہ شرناء نواز استاد ملن٘گ حسین ٻیٹھے ۔۔۔ عاشق خان بزدار آپوں ڄاݨ اٹھی تے مائیک تے ڳئے تے آکھیونے جو ایں پُرب اِچ ٻہوں معتبر ہستیاں موجود ہن، پر اے پُرب ایں ڳالھوں ودھیک معبتر ہے جو ایں پُرب اِچ استاد ملنگ حسین آیا ٻیٹھے ۔۔۔ پر افسوس دی ڳالھ اے ہے جو انہاں کرساں دے پچھوں پدھر تے ٻیٹھے ۔۔۔ میں استاد ملنگ حسین کوں گزارش کریساں جو تشریف گھن آون تے میݙی کرسی تے آن ٻہن ۔۔۔ اے ڳالھ تاں اون٘ویں یاد ڳئی ہئی ۔۔۔ تے استاد خمیسے دی ٻئی ڳالھ اے یاد آ ڳئی اے جو استاد خمیسہ آپݨے پتر کوں نغارے دا فن وی سکھین٘دا پئے ۔۔۔ استاد خمیسہ دیاں سُراں سڄݨیں دی نظر ۔۔۔