استاد تے سرائیکی دانشور جناب محمود نظامی دا ݙکھ

دوستو ! تساں کل دی پوسٹ( بجٹ تے زراعت دی ترقی دا کارپوریٹ نظریہ) تے ٻہوں سٹھا رد عمل ݙتا ہے ڄس نال میݙا حوصلہ ودھیا ہے ۔میں انہاں سبھݨاں دوستاں دا شکر گزار ہاں جنہاں میݙی لکھت کوں پسند کیتے،اڳو تے ٹوریا تے نال اپݨے سوہݨے خیالات دا اظہار کیتے،حالانکہ سچی ڳل ہے ڄو لکھت دی حروف ابجد سکھدے ودے ہیں،ݙوجھا میں سمجھی ودا ہم ڄو سرائیکی لکھتاں کوݨ پڑھدا ہے پر تہاݙے ردعمل توں ظاہر تھیندا ہے ڄو وسیب ڄاگدا پیا تے اوں دی ہر ڳل تے نظر ہے۔

کل آلی پوسٹ دی ݙوجھی تے آخری قشط لکھݨ دا اج پروگرام ہا لیکن اساݙے درویش تے دانشور ،استاد محمود نظامی صاحب دی ڈی سی او بہادر ڈیرہ غازی خان تے انہاں دے گارڈز دے ہتھوں ہتک تے گرفتاری توں بعد دل بوجھل ہے تے مذکورہ موضوع تے لکھݨ کیتے دل نئیں پیا کریندا۔ایں حوالے نال اج سائیں رؤف کلاسرا صاحب روزنامہ دنیا اچ ٻہوں سوہݨا کالم لکھیا ہے تے استاد محمود نظامی دی شخصیت دا پورا نقشہ اساݙے سامݨے رکھ ݙتا ہس ،جیں دے بعد لکھݨ دی گنجائش باقی نئیں راہندی پراستاد محمود نظامی دا قرض کیویں لہاؤں؟ استاد محمود نظامی نال میݙا پہلی ملاقات اڄ توں پنج سال پہلے میانوالی اچ تھئی ہائی ڄݙاں او سائیں مشتاق ڳاݙی ،فضل لنڈ تے سائیں خادم حسین نال اساݙے دفتر اچ تشریف گھن تے آئے ہن اوں رات اساں سارے دوست اپݨے دفتر واقع پی اے روݙ اچ ستے ہسے ۔وݙلے ساکوں کالاباغ تے پراݨی ماڑی ونڄ تے دوستاں نال ملاقاتاں کرڑنیاں ہن تے شام کوں کالا باغ اچ دریائے سندھ دے کنارے تے محفل موسیقی تے جھمر دی چس چاوݨی ہائی ۔لنگر اچ گوشت شامل ہووݨ دی وجہ نال سائیں مشتاق ڳاݙی تاں چٹنی نال ٹکر کھادا پر استاد محمود نظامی شہزاد ہوٹل دی کڑھائی کھا کے ٻہوں خوش تھیا ہا۔پوری رات جتنی دیر ڄاڳدے رہے استاد محمود نظامی اساکوں ہسیندے رہے ۔ݙوجھے ݙینہہ پراݨی ماڑی اپڑیوسے تاں اتھاں ٻہوں سارے دوست اساݙے انتظار اچ کھڑے ہن ۔دریائے سندھ پراݨی ماڑی دے کالاباغ دے درمیان اچ گزر کے میدانی علاقے ݙھاندا پیا ہے تے ماڑی کالاباغ دی مخالف سمت اچ ٻہوں پراݨا شہر ہے جس نال کئی پہاڑیاں وی ہن ۔انہاں پہاڑیاں وچوں ہک اچی پہاڑی تے بدھسٹاں دی ٻہوں پراݨی عبادت گاہ وی ہے ۔ اس پہاڑی تے چڑھنا جوان بندے کیتے وی اوکھا ہے پر محمود نظامی اوں ݙیہاڑے مشتاق ،فضل تے ݙوجھے ڄواناں تھوں ودھ کے جوان ہووݨ دا مظاہرہ کیتا۔ واپسی تے دریائے سندھ اچ دھاندے رہے تے ڳاندھے رہے ۔

دریا او دریا پینڈے تیݙے ݙونڳھے

توں اساݙا ما پیئو اساں تیݙے پونڳے

اشو لعل دا اے ڳیت استاد محمود نظامی سݨ کے دریائے سندھ دیاں لہراں نال کھیݙا ہا،کہے ویلے بیڑی تے ونڄ باندہ ہا تے کہیں ویلے ریت اتے لیٹدا ہا۔ اس دی دریائے سندھ دے پاݨی تے سندھو دی ریت نال پیار تے محبت میتے اوں ݙیہاڑے آشکار تھئی ۔ شام کوں کالاباغ اچ دریائے سندھ دے کنارے طاہر ساقی نے ہک ٻہوں سوہݨی محفل لائی ہوئی ہائی ۔کیا خوبصورت چندر نکلا ہویا ہا ،سندھو دے پاݨی اچ اپݨا عکس پیا پیندا ہا ،دریا اچ بیڑیاں وڳدیاں کھلوتیاں ہن ،اساں بوہڑ بنڳلے دے نال ٻہہ تے دریا دے پاݨی نال کھیݙے رہے تے اپݨے دل دیاں ڳلاں کریندے رہے ۔طاہر ساقی وی ساری رات سرائیکی لوک گیت سݨیدا رہیا تے اساں وی گھمران پیندے رہیوسے ۔ٻس اس شام محمود نظامی ڄہڑی جھمر ماری ہا تے سندھو نال اپݨی لازوال عقیدت دا اظہار کیتوس اوہ اپݨی مثال آپ ہے ۔

اوہ تاں ہک درویش صفت انسان ہے ،اوہ ہک اے ڄیہا دانشور ہے ڄہڑا عدم تششد د تے یقین رکھیندا ہے ،سندھو ،اس دی ریت تے تاریخ نال پیار کرݨ آلا ہک انسان کیویں متششدد ہو سڳدا ہے ۔خان بہادر ڈی سی او صاحب تساں محمود نظامی کوں نیویں سیاݨدے دے پورا وسیب ڄو گواہی ݙیندا کھلوتا ہے ،تساں زرا دریائے سندھ دیاں لہراں تھوں تاں پچھوں ڄو محمود نظامی کوݨ ہے ،انہاں کول نئیں پچھ سکدے تاں سندھو دی ریت کول تاں پچھ ڳھندے ،دھرتی دی تاریخ وی تہاکوں ݙسیندی ڄو میݙا عاشق جارح نئیں،یقینا اے تہاݙے محافظاں کول پھل چک تھی ہے ،انہاں دا محاسبہ تھیوݨا چاہی دا ہے ڄہڑیاں سندھو تے عاشق دی ہتک کیتی ہے ،اے ہتک محمود نظامی دی نئی چار کروڑ سرائکیاں ،سندھو دی ریت تے اس دے پاݨی تے تاریخ دی ہتک ہے ۔ہو سڳدا ہے محمود نظامی تہاکوں معاف کر ݙیوے پر خان بہادر یاد رکھیسیں سندھو دا پاݨی تیکوں معاف کائی نا کریسی.