استاد اللہ داد خان

استاد اللہ داد خان، ریڈیو پاکستان بہاولپور نال وابستہ ہک کلاسیکی گلوکار ہن۔ خواجہ غلام فرید دے کلام کوں ڳاوݨ اچ خاص مہارت رکھدے ہن۔ راڳ سندھی بھیرویں تے مکمل عبور رکھدے ہن۔ ایندے علاوہ راڳ درباری، مالکونس، دیپک، جوڳ وغیرہ تے وی مکمل عبور رکھدے ہن۔ ریڈیو کیتے لازوال گیت تے کافیاں ڳائیاں۔ تقسیم ہند توں پہلے امرتسر اچ پیدا تھئے تے پاکستان بݨݨ دے بعد ہجرت کرکے بہاولپور شہر اچ آݨ وسے۔ انہاں دی رہائش احمدپور روڈ دے نیڑے ہئی۔ ریاض کرݨ کیتے اکثر اپݨے سنگتیاں دے نال احمدپوری گیٹ اچ ہک چوٻارے تے ویندے ہوندے ہن۔ ایندے علاوہ ہک چوٻارہ فتح خان بازار دے نیڑے وی گھدا ہویا ہئی جتھاں ریاض کریندے ہن۔ اکثر محفلاں اچ ڳاوݨ کیتے ملتان، جلالپور پیروالہ تے ہتھیجی وی دعوت تے ویندے ہوندے ہن۔ انہاں دا انتقال 2004ء اچ تھیا۔