اساں قیدی تخت لہور دےـــــــــ آخر کے تئیں
اساں قیدی تخت لہور دےـــــــــ آخر کے تئیں...
لکھت ـ ادی نینا
واہ انصاف سرکار تیݙا انصاف.... ٌ میکوں ووٹ ݙیوو تے میں سرائیکی صوبہ بݨیساں ٌ... اے کل دی ڳالھ اے، 2018 دی الیکشن مہم ءچ نام نہاد سرائیکی اڳواݨ مخدوم زادہ خسرو بختیار تے اڄوکے وزیراعظم عمران خان مشترکہ پریس کانفرنس اچ سرائیکی قوم کوں صوبہ سرائیکی بݨاوݨ دا خاب ݙکھالا ہئی تے اساں بھولے بھالے سرائیکی آپݨیں آپ اچ سممدے نہ ہاسے. ایویں لڳدا ہا الیکشن ءچ تحریک انصاف دی کامیابی تے عمران خان دا وزیراعظم بݨݨ ای اساں سرائیکیاں دی منزل اے. تحریک انصاف دی حکومت کوں ݙوں سالھ تھیوݨ آلن، صوبہ سرائیکستان تاں ٻہوں پرے دی ڳالہہ اے، اے انصافی سرکار تاں سرائیکیاں دی شناخت مٹاوݨ تے تُل ڳئی اے تے اساکوں سرائیکی منݨ کیتے ای تیار کائنی... جیندا ثبوت انصاف سرکار دی طرفوں کرونا وائرس دی وباء کنوں بچݨ سانگے چتاوݨی ݙیوݨ آلی ہیلپ لائن اچ ملخ ءچ سبھ توں ڈھیر ٻولݨ آلی سرائیکی زبان کوں شامل نہ کرݨ اے. حکومت پاکستان آفیشل کرونا چیٹ بوٹ تے انگریزی، اردو، سندھی، پشتو، پنجابی، بلوچی تے کشمیری زبان کوں شامل کرݨ تے اساکوں کئی اعتراض کائنی، مگر چھی کروڑ کنوں ڈھیر سرائیکی ٻولݨ آلیں دے خلاف تخت لہور دی سازش دا حصہ بݨݨ تے سموری سرائیکی قوم مذمت کریندی اے. تخت لہور دے راڄ ءچ تاں سرائیکی پیلھے وی ساہ جھݨ جھݨ جیوݨ دے ترلے کریندے پئین تے اڳی تے وی آپݨے حق سانگے ٻاݨ مریسن ـ اساکوں امسوس وزیراعظم تے وزیر اعلیٰ عثمان بزدار دا ھے جو وݙے وݙے وعدے کرݨ آلے اڄ سرائیکی قوم دی شناخت مٹاوݨ دی سازش دا حصہ بݨ ڳئین. سرائیکی قوم نال اے ول وانجھ 73 ورہیاں توں جاری اے.
اساݙی شناخت مٹاوݨ دی ایں سازش تے ساریں سرائیکی تنظیماں، صحافیاں، دانشوراں تے سموری قوم کوں جڳاوݨ سانگے دھرتی ڄئی جیوݨ جوڳی ساݙی بھیݨ صحافی ڈاکٹر سعدیہ کمال دی چیک سݨ تے سرائیکی عوامی تریمت تحریک دی صدر ادی کرن لاشاری آپݨی سوہݨی لکھت اچ بھرپور احتجاج کیتے تے اساݙے ٻئے وی ڈھیر سارے بھرا مذمت کریندے پئین. سرائیکی عوامی تریمت تحریک دی ہک ادنیٰ جئیں کارکن دی حثیت نال میں وی اڄوکی سرکار اچ شامل سرائیکی ارکان اسمبلی، تحریک انصاف دے سرائیکی مہاندرے، کارکنان، ملخ دیں ساریں سیاسی تنظیماں، صحافیاں، دانشوراں تے سرائیکی بھیݨیں، بھرانواں کوں ارداس کریندی آں جو ہݨ جاڳو، سڄاڳ تھیوو تے ہک مٹھ تھی آپݨیں حق سانگے چپ دا روزہ تروڑو تے ایں ناانصافی تے احتجاج ریکارڈ کراؤ...
بقول: غیور بخاری...
ــــــــــــــــــــــــــــــــــ
کیا حال ہے
کیا ڳالھ ہے
گم سم اتے چپ چاپ ہو
کجھ ٻولݨا ہا بُھل ڳیوں
کجھ ڳولݨا ہا بُھل ڳیوں
روزی دے رولے ٹھیک ہِن
پر دوستو ایں حال وچ
قوماں دے حق دے واسطے
ٻہہ راہواݨا وی کوڑ ہِے
چپ راہوݨا وی کوڑ ہِے
جاڳو جڳارے ٹھیک ہِن
حق دے ٻلارے ٹھیک ہِن
آکھیا ہا ٌ طارق بادشاہ ٌ
چڑیاں اٹھو کوئی دھاں کرو
چپ نہ کرو چپ نہ کرو
ٻہہ راہوݨا ہُݨ کوڑ ہے
چپ راہوݨا ہُݨ کوڑ ہے
جیوے سرائیکی سدا جیوے ٌ