ارشد اجمل
اصل ناں محمد ارشد خان
قلمی ناں ارشدؔ اجمل
جٖمنْ 1984ء
تعلیم مڈل
پیشہ پاک آرمی(سپورٹس مین)
فون نمبر 0302 9640790
جاہ پتہ چکنمبر 149سی/ٹی ڈی اے جمن شاہ ضلع لیہ
غزل
لکھواجٖاں تاں فی الحال سم گٖئے ہن ، ضمیر جاگٖئے تاں گٖالھ بنْسی
فلک تے ونجٖ کے دعاء دے ٹولے اخیر جاگٖئے تاں گٖالھ بنْسی
اے سب لٹیرے تے چور ڈاکو جو سارا دربٖار مل کے بٖیٹھن
اِتھاں قلندر مزاج آکئی فقیر جاگٖئے تاں گٖالھ بنْسی
اساں تاں گنگے بنْائے گٖئے ہیں ،زبان ساڈٖی تے تالے لئے گٖئے
اساڈٖی مظلومیت دے لُڑھدے جے نیر جاگٖئے تاں گٖالھ بنْسی
اِتھاں تاں جیونْ وی قید وانگوں، اِتھاں تاں مرنْ وی قید وانگوں
اِتھاں جو انصاف مُل وکاندن،اسیر جاگٖئے تاں گٖالھ بنْسی
اِتھاں تاں ہن راج ظلمتاں دے، اِتھاں ہے ارشدؔ اندھیر نگری
اِتھاں جے غیّور قافلیں دے امیر جاگٖئے تاں گٖالھ بنْسی
٭٭٭