ارشاد نظامی

اصل ناں       محمد ارشاد

قلمی ناں        ارشاد نظامیؔ

جٖمنْ           1953ء

تعلیم           مڈل

پیشہ            مستری (خرادی)

فون نمبر        0306 7126423

جاہ پتہ         مسعود آباد کالونی وارڈ نمبر 22لودھراں

ارشاد نظامی دا جنم بھومی قصبہ جلہ ارائیں ہے، مگر ساری حیاتی لودھراں شہر وچ خرادی مستری دا کم کریندیں گزری، تے نال دے نال 1972ء کنوں شاعری وی کریندے پئین۔سرائیکی شاعری دیاں تقریبًا ساریاں صنفاں لکھدن ۔آپ دے کئی شعری مجموعے وی چھپ چکے ہن ۔مثلًا ۔پیار دا پندھ، ڈٖکھ سجٖنْ دے ، ڈٖکھ جندڑی دے ، وکھرے ڈٖکھ۔وغیرہ۔جتھوں تک آپ دی غزل دا تعلق ہے تاں بٖہوں سوہنْی غزل لکھدن۔نمونہ کلام حاضر ہے۔

غزل

تیڈٖے پیار دا پانْی بھر بھر تے

ودا جیندا ہاں چن مر مر تے

ہک یار تیڈٖے دیدار پچھوں

ودے دھکڑے کھاندوں در در تے

میں تئیں توں جندڑی وار ڈِٖتی

توں ملدا ہیں چن ڈٖر ڈٖر تے

سُنْ مہنْے طعنے لوکاں دے

مُک خون گٖیا ہے جھر جھر تے

میں پیار تیڈٖے دا ترسا ہاں

ڈٖے جام وصال دا بھر بھر تے

ارشاد حیاتی مُک گٖئی ہے

تئیں چن دیاں منتاں کر کر تے