احمد سعید گُل

اصل ناں       سعید احمد خان

تخلص          گُل

ڄمݨ           1945ء

تعلیم           میٹرک

پیشہ            محنت مزدوری

فون نمبر        03006861856

جاہ پتہ         بلوچ نگر وارڈ نمبر4 شہر مظفر ڳڑھ

شعری مجموعہ’’ول آ پاروں‘‘دے خالق احمد سعید گُل دے حوالے نال شاکر شجاع آبادی لکھدن جو’’سعید گُل کجھ روایتی تے کجھ تخیل دی شاعری کریندن ،میں تخیل دا قائل ہاں اللہ کرے جو گُل سئیں وی روایتی شاعری توں ہٹ کے صرف تخیل تے قائم رہن‘‘۔بہر حال گُل صاحب ترائے مصرعیاں تے مشتمل ہک نویں صنف ’’سنڄاپو‘‘ متعارف کراوݨ دی کوشش کیتی ہے۔ݙیکھاں کتھوں تائیں کامیاب تھئین؟خدا بہتر ڄاݨدے۔غزل دا نمونہ حاضر ہے۔

(1)غزل

مہݨے یار ݙیواویں نہ ہا

دوکھے باز سݙاویں نہ ہا

اے تاں سچ ہے میݙا رہسیں

پھٹکی کہیں دی چاویں نہ ہا

شالا ماݨے ڈھول جوانی

مہݨے ہاب کراویں نہ ہا

اوکھی سوکھی نبھ ونڄے ہا

کوڑے لارے لاویں نہ ہا

ہاں اچ گُلؔ توں آپ جو ہانویں

ہاں تے ہل وہاویں نہ ہا