احمد سعید زخمی

اصل ناں      احمد سعید

قلمی ناں      سعید زخمی ؔ

جمن           1961ء  

تعلیم          پرائمری

پیشہ           رڑھ واہی 

فون نمبر       03451680200

جاہ پتہ        ہیڈ بکائنی،جتوئی ضلع مظفر گڑھ

(1) غزل

اساں لاچار ہیں سانول، اساں نادار ہیں سانول

اساں نہ کہیں دی چاہت ہیں ،نہ کہیں دا پیار ہیں سانول

اساں مجنوں ،اساں پاگل،اساں منصور، سرمد ہیں

اساں سنگسار تھیندے ہیںیا چڑھدے دار ہیں سانول

نہ کہیںدے دل دی دھڑکن ہیں،نہ کہیں دے من دی مورت ہیں

ساڈا ہوون نہ ہوون ہے، اساں بے کار ہیں سانول

گلابی گُل تیڈا چہرہ تیڈے صدقے تھیون بلبل

ذرا دامن بچا کے ٹُر اساں تاں خار ہیں سانول

اساں او فالتو شئے ہیں،جو ہے میزان توں وافر

اساں زخمیؔ ایں دھرتی تے اجائی دا بار ہیں سانول

---------------------------------------

ساکوں ہردم کالی رات بھلی اے چن تارے رکھ کول اپنے

جیڑھا ساڈے لیکھ اچ لکھیانئیں او ڈیکھن تارا چھوڑ ڈتے

اساں محرم موج طوفاناں دے اساں گھان الم دے واقف ہیں

ہُن ساحل نہ وندلا ساکوںاساں آپ کنارا چھوڑ ڈتے

تیڈی یاد دی پاک کتاب کوں ٹھپ سک سدھر دا ویڑھ غلاف رکھئے

جیڑھا پڑھدے ہاسے نت زخمیؔ او پڑھن سپارا چھوڑ ڈتے

٭٭٭