اتھے کوئی ݙیوݨ ݙیوݨ ہے

معظم خان ہاتھی خیل اساݙے علاقے دا ہک عظیم کردار ہائی تے لوک اس دے مرݨ توں پنجھاہ سال بعد وی اس دیاں ڳلاں نئیں بھلے ،او اڄ وی اپݨیاں ڳلاں اچ معظم خان دیاں ڳلاں دے حوالے ݙیندے کھلوتے ہن ۔اوہ ہک اے جھیا لوک کردار بݨ ڳیا ہے ڄہڑا زندہ ہے تے کݙاں وی نہ مرسی ۔۔۔۔۔۔۔۔۔۔۔۔،میں پچھلی پوسٹ اچ اس دی ہک ڳل ورتائی ہم تے ہݨ ہک ہور ڳل تہاݙے نال ورتاوڑاں چاہندا ہاں،کیوں ڄو انہاں چھوٹیاں چھوٹیاں ڳلاں دے وچ ٻہوں وݙیاں وݙیاں ڳلاں لکیاں ہویاں ہن تے اے وݙیاں ڳلاں تساں آپ لبھڑیاں ہن۔

ہک واری میانوالی اچ سیلاب دی وڄاں نال ٻہوں تباہی تھئی ،لوک بے گھر وی تھئے ،مال مال مویشی مر ڳئے ،گھر ݙھا ڳئے ،فصلاں لڑ ڳئیاں تے مخلوق بے حال تھی ڳئی۔سیلاب توں بعد اوں ویلے دے گورنر میانوالی دا دورہ کیتا جس دے وچ علاقے دے وݙے وݙے زمینداراں ،تاجراں،مخیر حضرات کوں سݙیا ڳیا۔تقریب اچ امیر عبد اللہ خان روکھڑی ،نواب ملک مظفر بھچر ،کالاباغ دے نواب ،عیسیٰ خیل دے خوانین ،پپلاں دے خان تے ݙوجھے وݙے زمیندار وی شریک تھئے ۔گورنر صاحب تقریر کیتی،سیلاب دیاں تباہ کاریاں ٻارے ݙسیوس۔۔۔۔۔۔تے نالے سبھ توں اپیل کیتوس ڄو اوہ سارے حکومت دی مدد کرن تاں ڄو سیلاب توں متاثر تھیوݨ آلے لوکاں دی مدد کیتی ونڄ سڳے۔

معظم خان ہاتھی خیل ٻہوں غریب بندہ ہائی ،جس دی توے تے وی نائی ویندی پر چٹے کپڑے تے پڳ ہمشاں لیندا ہائی ۔گورنر دی تقریب اچ معظم خان چٹے کپڑے پا کے تے پڳ لا کے ونڄ وڑیا تے سارے منظر نوں غور نال ݙیدھا رہیا،گورنر دی تقریر توں بعد کہیں زمیندار آکھیا ڄو اوہ پنچ سو بوری کݨڑک دی ݙیسی کہیں ترائے سو لکھائی کہیں ݙوں سو لکھائی کہیں ہزار لکھائی۔۔۔۔ تے ایویں لکھیندے گئے۔۔۔۔۔۔۔۔معظم خان دی وراری آئی تاں او وی اٹھیا ،،،،،تے اکھیوس ۔۔۔۔۔میں کݨرک دی ݙوں ہزار بوریاں ݙیساں۔گورنر آکھیا ۔۔۔۔معظم خان آسے تاڑیاں ۔۔۔۔۔ ۔۔۔۔انڄیں معظم خان میلا لٹ ڳدھا۔۔۔۔تقریب ختم تھیئی تاں امیر عبداللہ خان روکھڑی ،معظم خان کول پچھیا ۔۔۔وے معظم خان ۔۔۔! ویندی تاں تیݙی توے تے نیئں ،تیں ݙوں ہزار بوری دا اعلان کر ݙتا ہے تے اے کتھوں ݙیسیں۔۔۔۔۔؟ معظم خان آکھیا ،اہ ،،،،اتھے کوئی ݙیوݨ ݙیوݨ ہے ۔۔۔۔اتھے تاں لکھاوݨ لکھاوݨ ہے.