ابو محمد ابدال چشتیؒ
خواجہ محمد یاابو محمد بن ابو احمد ابدال چشتیؒ
(پیدائش:محرم 331ھ﴾
﴿وفات:ربیع الاول 411ھ)
آپؒ دا لقب ولی الدین یا ناصح الدین ہئی. آپؒ ابو احمد ابدالؒ چشتی دے فرزند ارجمند، مرید تے خلیفہ ہن۔ آپؒ مادر زاد ولی ہن۔ ابو احمد ابدال چشتیؒ کوں رسول کائنات ﷺ نے ایں فرزند ارجمند دی بشارت ݙتی ہئی۔ آپؒ نے فرمایا ہئی کہ اے ابو احمدؒ، خدا تیکوں ہک بیٹا ݙیسی جیں دا ناں میݙے ناں تے محمد رکھݨا۔
حالاتِ زندگی
لکھوچویہی سال دی عمر وچ آپؒ دے والد ماجد دا انتقال تھیا تاں آپؒ انہاں دے مصلے تے جلوہ افروز تھئے. کئی وار کھوہ وچ لٹک کے نماز معکوس ادا کریندے۔ ست ݙینہ بعد یک کجھور تے پاݨی دے ہک گھٹ نال افطار کریندے۔ چہرے تے ایسا نور ہئی کہ ݙیکھݨ والا گرویدہ تھی ویندا ۔ آپؒ دے ہتھ تے کثرت نال غیر مسلماں نے اسلام قبول کیتا۔
ہک مرتبہ بادشاہ دیناراں دی تھیلی گھن کے حاضر تھیا جینکوں آپؒ نے انکار کر ݙتا تے فرمایا کہ ساݙے بزرگاں دا ایہ طریقہ نی. جیہڑے وقت بادشاہ نے اصرار کیتا تاں آپؒ نے دریا دی طرف منہ کیتا، ہزاراں مچھلیاں منہ وچ دینار گھدی کھڑیاں ہن. آپؒ نے بادشاہ کوں فرمایا جس دے کول اس قدر خزانہ غیبیہ موجود ہووے اوہ تیݙی ایں تھیلی دی کیا قدر کریسی.
ستر سال دی عمر وچ اشارہ غیبی نال سلطان محمود غزنوی دے نال سومنات دے جہاد وچ شریک تھئے. چند خدام وی نال ہن.
[١] آپؒ دے ترے خلفاء ہن. ہک خواجہ ابو یوسف، ݙوجھے خواجہ محمد کاکو تے تریجھے خواجہ استاد مروان، ایہ تریہے حضرات آپؒ دی وفات دے بعد مسند ہدایت و ارشاد تے بیٹھے۔ سیرالاقطاب دے مصنف نے آپؒ دی تاریخ وفات چوݙہ ربیع الاول411ھ ݙسی ہے. جبکہ شہزادہ دارا شکوہ قادری نے سفینۃ الاولیاء وچ یکم ماہ رجب 411ھ لکھی ہے۔[٢]