آہ کرشن لال بھیل

آہ کرشن لال بھیل ہک موسیقی نال تعلق رکھݨ آلا فنکار ہاـ

آہ کرشن لال بِھیل

نہ ادب دی قدر ہے نہ ادیب دی،نہ فن دی قدر ہے نہ فنکار دی،نہ شاعر دی قدر ہے نہ شاعری دی، نہ کھیݙ دی قدر نہ کھلاڑی دی۔ ہک عجیب کھیݙ ءِ کھݙیندا پئے جتھاں کھیݙݨ والا تماشائیں دی داد دی چَس ءِچ ایں کھیݙ ءِچ مگن ہے جو اوکوں نہ آپݨی سُدھ ہے نہ آپݨی صحت دی نہ ویلھے دی۔ بس او داد پُچھوں ڳالھا تھی تے بَلا گُھمیندا کھڑے۔ کھیݙ مُکدی ءِ سارے ݙیکھݨ والے تے داد ݙیوݨ والے کپڑے چَھنڈکیندے او پئے ویندن۔ کہیں کوں کوئی سُدھ کائنی جو کھلاڑی دی کھیݙݨ دے بعد کیا حالت ہے تے نہ کہیں اے کوشش کیتی ہے جو پتہ کیتاونڄے جو او بندہ جیڑھا کلھا ہزاراں تے لکھاں بندئیں دے منہ تے مُسکار دا سبب بݨیے اوندا کیا حال ہے۔ اوݙوں کھلاڑی حیاتی دیاں تکھیاں بالیں کھیݙ کھیݙ باقی بچیا کھڑا ہوندے۔ایں دوران اوکوں ہک تعریفی پَھرا ملدے جیکوں عام طور تے اعزاز آکھیا ویندے جیکوں وصول کر تے او ایندی خوشی وچ کجھ ݙینہہ ٻئے کھیݙݨ جوڳا تھی پوندے۔ پر کتھاں صرف پَھرے نال حیاتی بچے ہا تاں وَلا کیا ہا۔نہ ادب دی قدر ہے نہ ادیب دی،نہ فن دی قدر ہے نہ فنکار دی،نہ شاعر دی قدر ہے نہ شاعری دی، نہ کھیݙ دی قدر نہ کھلاڑی دی۔

اینویں ہی دھرتی ڄایا، آپݨے نویکلے فنی اسلوب نال جڳ تے ڄاݨیا سُنڄاتا ونڄݨ والا فنکار "کرشن لال بھیل" ساری حیاتی ایں دھرتی دی تے دھرتی ڄئیں دی خدمت کیتی ءِ تے موسیقی دے میدان ءِچ ہک بھرپور اننگز کھیݙی ءِ جتھاں تماشائی محو تھی تے ایں فنکار کوں داد ݙیندے رہ ڳن۔ پر جیڑھے اے فنکار،اے موسیقار پویلین ݙو ڳئے تاں ہر کوئی کپڑے چھنڈک تے ٹُر پئے۔ خالی پویلین تے نامورکھلاڑی کلہیپے وچ زمانے دے زخمیں وچ چُور زخم بھریندئیں بھریندئیں ٹُر ڳئے۔ اوندی حیاتی وچ کہیں تماشائی ہوندے زخمیں ݙو دید نئیں بھالی۔ ہݨ سارے تماشائی اوندے ونڄݨ دے بعد ہوندے فن دی ہک واری وَلا داد کھڑے ݙیندن۔ کتنے اینجھے فنکارہن جنہیں دی جڳ تعریف کیتی ہے تے ہُنیں آپݨے فن کوں پوری دنیا وچ منوائے۔ پر چھیکڑی اوکھے ساہ گھن اوکھا ویلھا گزار تے او ٹُر ڳن تے ایں اوکھے ویلھے ہُنیں دی کنڈ تھپݨ والا کوئی نہ ہا۔بس حیاتی وچ تے حیاتی دے بعد ہر کوئی داد ہی داد ݙیندا رہ ڳئے۔ کہیں نئیں پُچھیا "کرشن لال بھیل" تیݙا کیا حال ہے؟

کرشن لال ہمیش آپݨے فن دے نال جیندا راہسی پر معاشرے دی بے حِسی معاشرے دا منہ چِڑیندی رہ ویسی۔نہ ادب دی قدر ہے نہ ادیب دی،نہ فن دی قدر ہے نہ فنکار دی،نہ شاعر دی قدر ہے نہ شاعری دی، نہ کھیݙ دی قدر نہ کھلاڑی دی۔

لکھت

شہبازتبسمؔ