آزاد لنگڑیال

اصل ناں       محمد بخش

قلمی ناں        آزاد لنگڑیال

ڄمݨ           1971ء

تعلیم          میٹرک

پیشہ           زمیندارہ

فون نمبر        0302 7951899

جاہ پتہ       رنگ پور بگھور تحصیل نور پور تھل ضلع خوشاب

آزاد لنگڑیال سرائیکی دا سڄاک ، چست چلاک تے مایہ ناز شاعر ہے۔آپ دا مشاہدہ ٻہوں تیز تے تخیلات دی پرواز بلند ہے۔آزاد دے ہر شعر وچ بھر پور شعریت پاتی ویندی ہے۔اوہ شعریت توں خالی (خانہ پری دا )کوئی شعر نہیں لکھدا۔اوہ فطری شاعر ہے ،شاعری دا نزول اوندے اُتے آمد دی صورت اچ تھیندے۔آزاد ؔلنگڑیال نور پور تھل دا اوہ خوش نصیب شاعر ہے جیکوں عوام اچ ٻہوں مقبولیت حاصل ہے، تے مقامی سطح تے تھیوݨ آلے اکثر مشاعریاں دی کمپئرنگ دا اعزاز وی آزاد صاحب کوں حاصل ہوندے۔ نمونہ کلام۔

(1)غزل

وقت اوکھا ہیا وقت دے نال ٹر

ٹر پیا ہیں تاں رک نئیں میݙالال ٹر

پندھ پیراں دا ہے پیر پچھ تے نہ رکھ

ہُݨ نہ چھالے ݙکھا وقت نہ ڳال ٹر

بھوڳ بھوڳݨ تاں  ݙے بھاڳ جاڳن متاں

بھوڳ بھوڳی ڄلوں بݨ کے بھائیوال ٹر

ٹور ایجھی ٹروں دنگ زمانہ تھیوے

ٹر میݙا جانیاں ٹر اکھیں بھال ٹر

شام تھیوݨ تے ہے مال وی ٹر پئے

آ تھکیڑے لہا توں وی دھݨوال ٹر

ہُݨ ہے آزاد ؔ ٹرݨاں مقدر تیݙا

پیر پکرن نہ پکرن بہر حال ٹر

(2)غزل

اندر دا کئی ادھور میݙے نال نال ہے

اے ہے میݙا قصور میݙے نال نال ہے

دیوانگی دا لطف بھلا او تئیں نصیب نئیں

جے تئیں میݙا شعور میݙے نال نال ہے

سر ہے تاں یار سر تے کئی بار وی ہے

دستار دا غرور میݙے نال نال ہے

میں ہاں قصور وار منیندا ہاں اپݨاں جرم

یارو کوئی بے قصور میݙے نال نال ہے

اکھیاں دے آلھݨے توں وی بے گھر تھیا ہویا

ہنجھ دا یتیم پور میݙے نال نال ہے

میں آپ کجھ وی نہ جے ہاں تاں آپ نہ

آزادؔ کوئی ضرور میݙے نال نال ہے

٭٭٭