آزاد ؔلنگڑیال

اصل ناں       محمد بخش

قلمی ناں        آزاد لنگڑیال

جٖمنْ           1971ء

تعلیم          میٹرک

پیشہ           زمیندارہ

فون نمبر        0302 7951899

جاہ پتہ       رنگ پور بگھور تحصیل نور پور تھل ضلع خوشاب

آزاد لنگڑیال سرائیکی دا سجٖاک ، چست چلاک تے مایہ ناز شاعر ہے۔آپ دا مشاہدہ بٖہوں تیز تے تخیلات دی پرواز بلند ہے۔آزاد دے ہر شعر وچ بھر پور شعریت پاتی ویندی ہے۔اوہ شعریت توں خالی (خانہ پری دا )کوئی شعر نہیں لکھدا۔اوہ فطری شاعر ہے ،شاعری دا نزول اوندے اُتے آمد دی صورت اچ تھیندے۔آزاد ؔلنگڑیال نور پور تھل دا اوہ خوش نصیب شاعر ہے جیکوں عوام اچ بٖہوں مقبولیت حاصل ہے، تے مقامی سطح تے تھیونْ آلے اکثر مشاعریاں دی کمپئرنگ دا اعزاز وی آزاد صاحب کوں حاصل ہوندے۔ نمونہ کلام۔

(1)غزل

وقت اوکھا ہیا وقت دے نال ٹر

ٹر پیا ہیں تاں رک نئیں میڈٖالال ٹر

پندھ پیراں دا ہے پیر پچھ تے نہ رکھ

ہُنْ نہ چھالے ڈٖکھا وقت نہ گٖال ٹر

بھوگٖ بھوگٖنْ تاں  ڈٖے بھاگٖ جاگٖن متاں

بھوگٖ بھوگٖی جٖلوں بنْ کے بھائیوال ٹر

ٹور ایجھی ٹروں دنگ زمانہ تھیوے

ٹر میڈٖا جانیاں ٹر اکھیں بھال ٹر

شام تھیونْ تے ہے مال وی ٹر پئے

آ تھکیڑے لہا توں وی دھنْوال ٹر

ہُنْ ہے آزاد ؔ ٹرنْاں مقدر تیڈٖا

پیر پکرن نہ پکرن بہر حال ٹر

(2)غزل

اندر دا کئی ادھور میڈٖے نال نال ہے

اے ہے میڈٖا قصور میڈٖے نال نال ہے

دیوانگی دا لطف بھلا او تئیں نصیب نئیں

جے تئیں میڈٖا شعور میڈٖے نال نال ہے

سر ہے تاں یار سر تے کئی بار وی ہے

دستار دا غرور میڈٖے نال نال ہے

میں ہاں قصور وار منیندا ہاں اپنْاں جرم

یارو کوئی بے قصور میڈٖے نال نال ہے

اکھیاں دے آلھنْے توں وی بے گھر تھیا ہویا

ہنجھ دا یتیم پور میڈٖے نال نال ہے

میں آپ کجھ وی نہ جے ہاں تاں آپ نہ

آزادؔ کوئی ضرور میڈٖے نال نال ہے

٭٭٭