آزادؔ رنگپوری

1952ء تا2016ء

شعری مجموعہ’’ ہُن وس بدلا‘‘ دے خالق آزاد رنگپوری دا اصل ناں بشیر احمد ہا جو ضلع بہاولپور دے نمائندہ شاعر ہن۔ واضع تھیوے جو رنگپور کھیڑا ضلع مظفر گڑھ وچ ہے ،رنگپور بگھور ضلع خوشاب وچ ہے ۔جڈاں جو آزاد مرحوم دا رنگپور خانقاہ شریف دے نیڑے ضلع بہاول پور وچ ہے ۔بشیر احمد آزاد رنگپوری دا تعلق ایجو کیشن نال ہا ،اوہ اپنے فرائضِ منصبی ادا کرن دے نال نال ’’ سرائیکی مجلس‘‘ بہاول پور نال وی منسلک رہ گئے۔تے ایویں سرائیکی زبان و ادب دے فروغ واسطے وی انہاں بے لوث خدمات سر انجام ڈتیاں۔اوہ ہک متحرک شاعر و ادیب ہن۔علمی ادبی کٹھ کرناں ،مشاعرے کراوناں،فلاحی کمیں وچ حصہ گھنناںانہاں دے من پسند مشاغل ہن۔شاعری دے حوالے نال آزاد رنگپوری دا اپناں ہک نویکلا رنگ ہا ، آپ دا شعری رنگ ملاحظہ تھیوے!

(1) غزل

من ٹھار میڈے من دا نہ ڈے سجن عذاب

تیڈے ہجر نے کیتے تن من میڈا کباب

مجبور ہاں میں جانی ہک پل نی چین آندا

مکھڑا ڈکھا چا دلبر رُخ توں ہٹا نقاب

مستی تیڈی دے اندر ہستی مٹا ڈتی ہِم

ساقی سڈا تے چپ ہئیں ڈتو نہ کئی جواب

من من تے منتاں ہاریم تھئی نہ مراد پوری

ملّاں تے جوسی سڈ تے پچھّم اے کیا حساب

گزری حیاتی ساری آزادؔ دی صبر وچ

ڈیوو صبر دا پھل سئیں تھی ونجاں پھُل غلاب

(2) غزل

میکوں لکھنی پئی اے غزل ڈیکھ تے

تیڈا حسن اصلی اصل ڈیکھ تے

میں کیویں بھلانوں او بھلدا نہیں

اوں عادل دا وکھرا عدل ڈیکھ تے

میڈے دل تے جادو کوئی تھی گی

  تیڈے لب دی سرخی کجل ڈیکھ تے

حشر دے ڈیہاڑے جزا تے سزا

خدا سب کوں ڈیسی عمل ڈیکھ تے

ہے آزاد ؔرب دا کرم تھی گیا

    گنہ گار خوش ہے فضل ڈیکھ تے